Փաստ ինֆո

Վարչապետը ճիշտ է, տնտեսության մեջ նրանց փոփոխությունները հեղափոխական են, քանի որ դժվար կլիներ առանց հեղափոխական փոփոխության այսքան լուրջ անկում գրանցել և ներդրումների իսպառ բացակայություն ապահովել։ «Փաստինֆո»-ի հետ զրույցի ժամանակ այս մասին ասաց Աուդիտորների պալատի նախագահ Նաիրի Սարգսյանը։

Անդրադառնալով եկամտահարկի համահարթեցմանը, որը Նիկոլ Փաշինյանը համարում է ինստիտուցիոնալ փոփոխություն, Նաիրի Սարգսյանը նշեց, որ դա առավել քան բացասական փոփոխություն է։ Նրա խոսքով այնպիսի երկրներում, որտեղ հարուստների ու աղքատների միջև տարբերությունը շատ մեծ է, որպես կանոն ներդնում են պրոգրեսիվ հարկման համակարգը. «Դրանով տեղի է ունենում եկամուտների վերաբաշխում՝ ի օգուտ աղքատների։ Այսինքն` ովքեր ավելի շատ են վաստակում, նրանք ավելի շատ են հարկ վճարում, իսկ ովքեր քիչ են վաստակում, քիչ են հարկ վճարում: Երբ նրանք ներկայացրեցին այս փոփոխությունը, նշեցին, որ աղքատության կրճատմանն ուղղված քայլ են անում, այնինչ ցածր եկամուտ ստացողները շարունակեցին նույն հարկը վճարել, բայց փոխարենն ավելացավ այլ հարկատեսակ։ Ստացվեց՝ նույն եկամտի տնօրինման և ծախսերի ավելացման պարագայում մարդկանց աղքատությունն ավելի խորացավ»,-նշեց Նաիրի Սարգսյանը՝ հավելելով, որ վարչապետը ստում է նաև այն ժամանակ, երբ ասում է, թե մինչև 2023 թվականը եկամտահարկը դառնալու է 20 տոկոս։ Մասնագետի խոսքով եկամտահարկի նվազմանը զուգահեռ ավելանալու է սոցիալական վճարը։

Ինչ վերաբերում է Նիկոլ Փաշինյանի մատնանշած մեկ այլ ինստիտուցիոնալ փոփոխությանը՝ աշխատատեղերի ավելացմանը, ապա Նաիրի Սարգսյանը նկատում է՝ վիճակագրական տվյալները ճշմարտությունը չեն արտացոլում, հետևաբար այստեղ թվերով հնարավոր չէ հակադարձել։

«Սակայն ամենայն պատասխանատվությամբ հավաստիացնում եմ, որ մեր երկրում աշխատատեղեր չեն ավելացել, ընդհակառակը՝ նվազել են։ Միայն ստվերային աշխատատեղեր են գրանցվել։ Երբ տնտեսությունն անկում է գրանցում, օրինաչափ է, որ աշխատակազմի կրճատում է տեղի ունենում։ Մեր երկիրը չի կարող դեմ գնալ այս օրինաչափությանը»,-ասաց Նաիրի Սարգսյանը։

Դիտարկմանը, որ կորոնավիրուսի համավարակի պայմաններում ինչպե՞ս կարող ենք նման լավ թվեր ունենալ, որոնք ներկայացվում են՝ հաշվի առնելով, որ շատերը գործազուրկ դարձան, իսկ տնտեսությունը վատ վիճակում է, Նաիրի Սարգսյանը նշեց, որ միշտ կարող ենք լավ թվեր ունենալ, եթե կառավարության կողմից ադեկվատ արձագանք լինի։ Չնայած տնտեսության կառավարման մեջ շատ կարևոր է, երբ կառավարությունն է բիզնեսին ազդակներ ուղարկում, Հայաստանում դա բացակայում է, ավելին, կան անգամ վատ նախադեպեր, երբ մասնավոր դաշտից ազդակներ են գնում կառավարություն, սակայն կառավարությունը հանցավոր անգործություն է դրսևորում և որևէ կերպ չի արձագանքում։

«Եթե կառավարությունը կառավարեր կորոնավիրուսի համաճարակը և բիզնեսի կողմից բարձրաձայնված հարցերին օպերատիվ լուծում տար, ապա այս չափի անկում երբևէ չէինք գրանցի։ Ե՛վ համաճարակը, և՛ պատերազմը տնտեսությանը խանգարող բնական հանգամանքներ են, սակայն կարևոր է կառավարությանը կառավարման ձևը։ Շատ ավելի կարևոր է անկումից հետո վերականգնման տեմպը»,-ասաց Նաիրի Սարգսյանը։

Վերջինս անդրադարձավ նաև Նիկոլ Փաշինյանի այն հայտարարություններին, որ 2018թ.-ից հետո մենաշնորհներ և այսպես կոչված «փայ մտնողներ» չկան։ Նաիրի Սարգսյանը գտնում է, որ այն անձը, որը մենաշնորհային դիրք էր զբաղեցնում որևէ բիզնեսում, այժմ էլ շարունակում է զբաղեցնել նույն դիրքը, ինչն ունի օբյեկտիվ և սուբյեկտիվ պատճառներ. «Այստեղ կա բիզնեսմենի սպառման ծավալ։ Օրինակ եթե բիզնեսմենը խոշոր սպառման ծավալ է ապահովում, հետևաբար ներկրման ժամանակ բորսաներով կարողանում է ավելի ցածր գին ստանալ, Հայաստան ներմուծել և կազմակերպել վաճառքը։ Դժվար է այս մոնոպոլիայի դեմ արդյունավետ պայքարել, երբ հստակ գործիքակազմ չեն կիրառում։ Ինչ վերաբերում է փայ մտնողներին, կա՞ բացահայտված գործ, որ ինչ-որ մեկին արգելել են և այդ հանցագործն այժմ պատժված է։ Եթե այդ փաստերը գոյություն չունեն, ապա մնացած ամեն ինչ դասական պոպուլիզմի դրսևորումներ են»,-եզրափակեց Նաիրի Սարգսյանը։

Աղբյուր` Փաստինֆո