Փաստ ինֆո

Եռաբլուրում առանձին լրատվամիջոցների՝ Փաշինյանին հարց տալու հնարավորության սահմանափակման ձեւն անդուր էր,- «Փաստինֆո»-ի հետ զրույցում նման կարծիք է հայտնել Երեւանի Մամուլի ակումբի նախագահ Բորիս Նավասարդյանը։

Ինչպես արդեն տեղեկացրել ենք՝ մայիսի 9-ին Եռաբլուրում ուժ է կիրառվել երկու լրատվամիջոցի ներկայացուցիչների նկատմամբ՝ ոստիկանական ուժերի գործադրմամբ սահմանափակելով նաեւ նրանց մուտքը՝ Եռաբլուր։ Ավելին, լրագրողին քաշքշելու գործին միացել էր նաեւ ՀՀ վարչապետի ժամանակավոր պաշտոնակատարի խոսնակ Մանե Գեւորգյանը։ Ընդ որում՝ վերջինիս մասնակցությամբ միջադեպ գրանցվել էր նաեւ Փաշինյանի՝ Սյունիք կատարած այցի ժամանակ։

«Անդուր դեպք էր, մանավանդ ինչպես էր մերժվում լրագրողների հարց տալու հնարավորությունը վարչապետի աշխատակազմի ներկայացուցիչների և թիկնապահների կողմից»,-նշել է Բ.Նավասարդյանը՝ միաժամանակ ավելացնելով, որ նման դեպքեր թերեւս կդրսեւորվեն նաեւ առաջիկա ընտրարշավի ժամանակ՝ հաշվի առնելով քաղաքական միջավայրի ներկայիս սրությունը։ «Բայց ամեն դեպքում սա խոսքի ազատության սահմանափակում չէի դիտարկի, քանի որ ամեն դեպքում այն հարցերը, որոնք հնչեցվում են, դրանց պատասխանները, կարծես թե, ակնհայտ են և այնպես չէ, որ հասարակությունը չի պատկերացնում և կողմնորոշված չէ այն կարգի հարցերի պատասխանների և բովանդակության վերաբերյալ, որոնք հնչելու էին Եռաբլուրում»,- նշել է ԵՄԱ նախագահը։

Նավասարդյանը մանրամասնեց, որ ընտրարշավի ընթացքում կարող է այսպիսի դեպքեր լինեն, որովհետև ցավոք, մեզ մոտ և իշխանության, և ընդդիմության ներկայացուցիչները որոշակի խտրականություն ունեն կոնկրետ լրատվամիջոցների նկատմամբ՝ հարցերին չեն ցանկանում պատասխանել, հարցազրույցներ չեն տալիս։ Ըստ նրա՝ ինչ- որ տեղ այս հարցում իրենց մեղքի բաժինն ունեն նաեւ լրագրողները և ԶԼՄ-ները, չնայած մեղքի մեծ բաժինը քաղաքական դաշտի ներկայացուցիչներինն է։

«2018 թվականի ապրիլ-մայիսից հետո ունեինք բավականին կարճ ժամանակաշրջան, երբ քաղաքական ուժերի ներկայացուցիչները հյուրընկալվում էին տարբեր լրատվամիջոցներում։ Դրսևորվեց այնպիսի երևույթ, որ լրագրողներն իրենց նույն կերպ չեն պահում, իրենց համակրանքը կամ հակակրանքը վայելող հյուրերի հետ և հարցերի բովանդակությունը և տրամադրվածությունը դրվում էր և դա, կարծում եմ, բերեց նրան, որ քաղաքական գործիչները հակառակ ճամբարի լրատվամիջոցների մոտ այլևս ցանկություն չունեն գնալ և ինձ թվում է այստեղ է լրատվամիջոցների հիմնական մեղքի բաժինը, որ չկարողացան հավասարակշռվածությունն ու չեզոքությունը պահպանել հյուրերի նկատմամբ։ Դա ցավալի երևույթ է։ Ամեն դեպքում, կարծում եմ, որ հիմնական մեղքի բաժինը, իհարկե, քաղաքական դաշտի ներկայացուցիչներինն է, սակայն լրագրողները իրենց որոշ չափով պահում էին որպես ավելի շատ քաղաքական գործիչ, քան պրոֆեսիոնալ»։

Այդուհանդերձ, նրա կարծիքով, նախընտրական ժամանակահատվածում լրագրողների աշխատանքի ազատությունն ապահովված է, ավելին՝ լրատվականների աշխատանքի տեսանկյունից սպասվում է բազմազան ընտրարշավ։

«Օրենսդրական այն նախաձեռնությունները, որոնք մտահոգիչ են, բացի մեկից, դեռ չեն ընդունվել և հուսով եմ, որ մինչև ընտրությունները չեն էլ ընդունվելու։ Մենք ունեինք մի քանի նախաձեռնություններ, որոնք մտահոգություն էին առաջացնում, սակայն հետաձգվեց դրանց քննարկման հարցը, կամ ընդհանրապես դուրս եկավ օրակարգից։ Նաև դաշտում ունենք բազմաթիվ տարբեր ուղղվածություն ունեցող լրատվամիջոցներ և բոլորը, կարծես թե կարողանում են իրականացնել իրենց գործունեությունն առանց լուրջ խոչընդոտների, այնպես որ կարծում եմ՝ լինելու է լրատվական տեսակետից բավականին բազմազան ընտրարշավ»,- «Փաստինֆո»-ի հետ զրույցում ասաց Երևանի մամուլի ակումբի նախագահը՝ միաժամանակ արձանագրելով, որ վերգետնյա հեռարձակողներն ունեն պարտականություններ ամբողջ հանրության առջև՝ հավասարապես եթերաժամ տրամադրելու բոլոր ուժերին, այլ լրատվամիջոցները սահմանափակված չեն։

«Նրանց քանակը, բազմազանությունը որևէ ձևով սահմանափակված չէ և այստեղ կարող են լինել նեղ քաղաքական ուղղվածություն ունեցողներ։ Ակնկալիք կար, որ ավելի մեծ լիներ ընտրարշավների ժամանակ չեզոք լրատվամիջոցների թիվը, սակայն ունենք այն, ինչ ունենք և դա որոշակի բացասական ազդեցություն է ունենալու ամբողջ ընտրական գործընթացի վրա, որովհետև առաջին հերթին դժվարացնելու է ընտրողների կողմնորոշման գործը. շատերը գտնվելու են այս կամ այն լրատվամիջոցի ազդեցության տակ» ։

Աղբյուր` Փաստինֆո