Փաստ ինֆո

Հունվարի 29-ին նշանակվել է ԵՊՀ Հոգաբարձուների խորհրդի նիստ եւ սկսվեցին ենթադրությունները, թե նախարարը ռեկտորի պաշտոնի համար մարդ է դրել: Այս մասին ԵՊՀ գիտխորհրդի հետ հանդիպման ժամանակ նշեց ԿԳՄՍ նախարարի ԺՊ Վահրամ Դումանյանը:

«Երկու թեկնածուներն էլ համալսարանական թեւից էին, իշխանական թեւը թեկնածու չառաջադրեց, այլ պաշտպանեց թեկնածուներից մեկին: Պաշտպանվեց Արտաշես Շահինյանի անվան ֆիզմաթ դպրոցի տնօրենի թեկնածությունը, սակայն նախագահ ոչ ոք չընտրվեց»,- նկատեց Դումանյանը:

Ըստ Դումանյանի, իրականում խորհդում մի բան է քննարկվել, իսկ ԵՊՀ կայքի հոգաբարձուների խորհրդին վերաբերող մասում այլ բան է դրված: 

«Փաստորեն այդ փաստաթուղթը, որը դրված էր, չէր ընդունվել խորհրդի կողմից: Իմ գործընկերներն ակնկալում էին, որ ես որպես նախարար պետք է հարցը կարգավորեմ: Ես չեմ կարող ասել, որ մենք կապ չունենք, Հոգաբարձուների խորհուրդն ինչ ուզում անում է: Մենք գործուղել ենք մեր ներկայացուցիչներին եւ կրում ենք պատասխանատվություն: Իսկ երբ երկրորդ նիստը հրավիրվեց օրակարգում չկար խորհրդի նախագահի ընտրության հարցը: Դրա համար մարդիկ ցանկություն չունեին մասնակցել այդ նիստին: Ես չէի կարող խնդրեի, բարոյական ճնշում գործադրեի, որ մասնակցեն մի նիստի, որտեղ չկա գլխավոր հարցը։  Մտածեցի, գուցե մյուս նիստում կընդգրկվի այդ հարցը: Բայց երրորդ անգամ եւս օրակարգում չկար նախագահի ընտրության հարցը եւ այո, առաջացավ ցանկություն նոր խորհուրդ ունենալու, որը կլինի ավելի գործնական եւ իմ տեսակետից կգործի ի շահ համալսարանի»,-հայտարարեց նախարարի ԺՊ-ն։ 

Դումանյանը նշեց, որ այդ նպատակով հոգեբարձուների խորհրդի անդամների կողմից գրվեցին հրաժարականի դիմումներ, եւ եթե խորհրդի կեսից ավելին դադարեցնում է իր անդամությունը, ապա խորհուրդը ցրվում է, ձեւավորվում է նոր խորհուրդ:

Ներկաները նկատեցին, որ ունեն ընդհամենը 1 ժամ ժամանակ, առաջարկեցին հարցեր ուղղել նախարարին։ Դումանյանը խնդրեց լսել իրեն և բանավեճի չվերածել:

«Ես շատ եմ լսել ձեզ, ընդ որում՝ նույն մարդկանց, խնդրում եմ թույլ տվեք ես ներկայացնեմ իրականությունը։ Լավ եկեք դիալոգի չվերածենք, հա՞»,- ասաց Դումանյանը։

Աղբյուր` Փաստինֆո