Փաստ ինֆո

Պատկերացնում ե՞ք՝ Նիկոլ Փաշինյանի կադրային քաղաքականությունն ինչպիսին է եղել։ Այսօր արդյունք տվող երկու մարմնի նախկին ղեկավարներից մեկը Սերժ Սարգսյանի հետ է, մյուսը՝ Ռոբերտ Քոչարյանի։ Այս մասին ԱԺ ճեպազրույցի ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը։

«Երեկ Վալերիյ Օսիպյանն ասում է՝ Քոչարյանին է աջակցում։ Նիկոլ Փաշինյանի նշանակած ոստիկանապետը, որը պետք է այս երկիրը կարգուկանոնի բերեր։ Հարցնում եք՝ ո՞նց է տապալվել հեղափոխության ռեֆորմը։ Այ այդպես»,-նշեց պատգամավորը։

Հարցին՝ արդյոք մտավախություն չունեն, որ ընտրապայքարից դուրս կմնան, քանի որ պայքարը լինելու է երկու բևեռի միջև, Էդմոն Մարուքյանը նկատեց՝ տարբեր մարդիկ ամեն օր փողով վերլուծություններ են անում և ասում, որ ընտրապայքարում միայն երկուսն են (խմբ. Նիկոլ Փաշինյան, Ռոբերտ Քոչարյան), մյուսները չկան.

«Ինչու՞ են այդպես անում, որ ժողովրդին ասեն՝ այլընտրանք չունեն։ Կա՛մ ներկա դժգույնն է ընտրում, կա՛մ հետ է գնում։ Տարբեր ԶԼՄ-ներ փողոցի հարցումներ են դնում, մարդկանց հարցնում են, թե ում են ընտրելու և այդ ցանկի մեջ «Լուսավոր Հայաստանը» չեն տալիս, որովհետև չեն ուզում՝ մարդը հիշի ու ասի «Լուսավոր Հայաստան»։ Այդ հարցման մեջ ինչքան տարբեր ուժերի անուններ են ասում մարդիկ, դա կտրում են ու թողնում միայն Նիկոլ Փաշինյան և Ռոբերտ Քոչարյան։ Բայց դա մեզ համար օգուտ է, որովհետև ժողովուրդը մտածում է՝ այս երկուսից պրծում չկա՞ և տեսնում է, որ կա պրծում, որը կարող է «Լուսավոր Հայաստան»-ի միջոցով լինել»,-ասաց Էդմոն Մարուքյանը։

Պատգամավորը նշեց, որ որևէ մեկին գումար չեն տալիս, որ գրեն՝ «Լուսավոր Հայաստան»-ը երկրորդ տեղում է։ Նրա խոսքով իր բանավեճը Նիկոլ Փաշինյանի հետ է.

«Հեղափոխությունն առաջնորդեցիր, քեզ բոլորս ողջունեցինք, բայց կառավարման մեջ տապալեցիր։ Քո երկու առանցքային պաշտոնյաներն այսօր քո համակարգը մերժած թևերի մեջ են։ Ո՞նց ես ուզում մեզ ասել, որ եթե իրենց ընտրենք, ավելի լավ է լինելու»,-ասաց Էդմոն Մարուքյանը։

Աղբյուր` Փաստինֆո