Փաստ ինֆո

Ոչ տրամադրություն կա, ոչ այն հպարտությունը կա, կոտրված ենք բոլորս,- «Հաղթանակ» զբոսայգում հայտարարել է ՀՀ ԱԺ «Լուսավոր Հայաստան» խմբակցության ղեկավար Էդմո Մարուքյանը։

Մայիսի 9-ը տարիներ շարունակ նշվել է որպես Եռատոն՝ Հաղթանակի օրը, Շուշիի ազատագրման օրը եւ Արցախի բանակի հիմնադրման օրը:

«Ակնհայտ է, որ յուրքանչյուր հաղթանակ պետք է կապիտալիզացնել, դարձնել ուժեղ պետություն: Որքանո՞վ ենք դա կարողացել անել, կարծում եմ՝ այսօր այն օրն է, որ գիտակցում ենք, որ լավ չենք այս ուղղությամբ թե մեր պետությունը կառուցել, թե արժեւորել այդ հաղթանակները, թե մեր պետական ինստիտուտների հզորությունը: Այն մարտահրավերը, որ մեզ նետվեց 2020-ին, ցույց տվեց, որ մենք հաղթանակը չենք կապիտալիզացրել, անցած տարիները մսխվել են»,- նշել է Էդմոն Մարուքյանն ու ավելացրել. «Պարզ է, որ այսօրը շատ տխուր օր է դարձել: Անցած տարի այստեղ այնքան մարդ կար, որ իրար հրում էին, բոլորն իրար շնորհավորում էին, հիմա էլ ենք շնորհավորում, բայց ոչ այդքան մարդ կա, ոչ տրամադրություն կա, ոչ էն հպարտությունը կա, կոտրված ենք բոլորս»:

Ըստ նրա՝ մեր բանակը կենաց-մահու կռիվ է տվել. «Մենք ապացուցել ենք, որ կռվող ազգ ենք, որ մինչեւ վերջ կարող ենք կռվել: Բաներ կան, որոնցով կարելի է հպարտանալ եւ դրանց վրա կառուցել, ոչ թե հուսահատվել եւ մտածել, որ ամեն ինչ կորած է»:

Նա ընդգծել է, որ այսօրվանից սկսած պետք է ոտքի կանգնել. «1-0 էր, դարձել է 1-1, ու այդ 1-1-ը կարող է դառնալ 2-1, 3-1 հօգուտ մեզ, եթե կարողանանք ուժեղ պետություն կառուցել: Մենք կարող ենք ուժեղ պետություն կառուցել, 10 միլիոնանոց ազգ ենք, ունենք մի երկիր, որտեղ 2-3 մլն մարդ է ապրում»:

Հարցին, թե հիմա մենք եռատո՞ն ենք նշում, Մարուքյանը դրական պատասխան տվեց. Այո, Եռատոն ենք նշում, վերջին հաշվով Շուշին ազատագրել ենք: Հիմա գրավել են Շուշին, բայց եռատոնը ազատագրելու մասին է: Դա նշանակում է, որ էլի կարող ենք ազատագրել: Հիմա ի՞նչ է, մտածում ենք, որ չի եղե՞լ հաղթանակ, Շուշին չենք ազատագրե՞լ»:

Աղբյուր` Փաստինֆո