Փաստ ինֆո

Պաշտոնյայի մամուլի քարտուղարը, իրավապահը որեւէ իրավունք չունեն բռնություն գործադրելու, առավել եւս քաշքշելու լրագրողին: Մամուլի քարտուղարի ինստիտուտի նպատակը «շեֆին» կրծքով պաշտպանելը չէ: Նման հայտարարությամբ է հանդես եկել Tert.am ի գլխավոր խմբագիր Արկադի Գրիգորյանը:

Ինչպես արդեն տեղեկացրել ենք, այսօր առավոտյան Նիկոլ Փաշինյանն այցելել է Եռաբլուր, որտեղ կայքի լրագրողը փորձել է հարց ուղղել նրան, բայց թիկնապահները թույլ չեն տվել, ավելին` միջամտել է նաեւ մամուլի խոսնակ Մանե Գեւորգյանը, որը եւս հրել է լրագրողին: Վերջինս վարչապետի պաշտոնակատարին ուղղել է միայն մեկ հարց` «ինչ է զգում ինքը Եռաբլուրում, ինչ խղճով է այդտեղ եկել», որն այդպես էլ մնացել է անպատասխան:

Արձագանքելով միջադեպին` կայքի գլխավոր Արկադի Գրիգորյանը ֆեյսբուքում գրել է.

«Մեր լրագրող Ani Gevorgyan ի հետ կապված միջադեպի թեմայով։ Այս պահին, որպես Tert.am ի գլխավոր խմբագիր, նաև որպես 15 տարվա լրագրողական փորձ ունեցող, պնդում եմ. լրագրության ոսկե կանոնն է, լրագրողը կարող է հարց ուղղել պետական պաշտոնյային երբ ուզի, որտեղ ուզի և ինչպես ուզի։ Պաշտոնյան կարող է պատասխանել, չպատասխանել, փախչել, ճողոպրել, ծառերի վրա մագլցել։ Դա իր որոշելիքն է։ Իսկ ահա մամուլի խոսնակն ու իրավապահը իրավունք չունեն մատով անգամ դիպչելու, նույնիսկ մոտենալու լրագրողին։ Մամուլի խոսնակի ինստիտուտի նպատակն ու ֆունկցիան շեֆին կրծքով պաշտպանելը չէ։ Իսկ այն, որ Tert.am-ը, Արմնյուզը և լրագրող Անի Գևորգյանը թիրախավորված են, ապացույցի կարիք չունի։ Անդրանիկ Քոչարյանների շեֆն այսօր անձամբ էր ասում հեռու տարեք այդ աղջկան։

Հաջորդ իշխանությունների օրոք, իսկ այդ օրը սարերի հետևում չէ, դատական բազմաթիվ գործերի մեջ հաստատ շատ են լինելու վերջին 3 տարում լրատվամիջոցների նկատմամբ ճնշումներն ու հետապնդումները, ազատ խոսքի ակնհայտ ճնշումները։ Ինչ ասեմ, բախտերդ փորձեք ու շարունակեք նույն ոճով, մամուլի դեմ պատերազմ հայտարարածները միշտ պարտվել են։ Ի դեպ, դուք պարտվելու հետ սեր ունեք, Շուշին վկա»:

Աղբյուր` Փաստինֆո