Փաստ ինֆո

Մայիսի 8-ը Երկրապահի օրն է: Երկրապահ կամավորականների միութան վարչության անդամները՝ ԵԿՄ վարչության նախագահ Սասուն Միքայելյանի և ԱԺ «Իմ քայլը» խմբակցության պատգամավոր Անդրանիկ Քոչարյանի հետ միասին Եռաբլուր զինվորական պանթեոնում են։ Ծաղիկներ են խոնահրում արցախյան պատերազմի հերոսների և Սպարապետ Վազգեն Սարգսյանի շիրիմներին։

Ավելի վաղ, ԵԿՄ վարչության նախագահը հանդես էր եկել ուղերձով՝ Երկրապահի օրվա առթիվ.

«Երկրապահ կամավորական ջոկատները Արցախյան Ազատամարտի տարիներին, համախմբվելով մեկ գաղափարի շուրջ, Սպարապետ Վազգեն Սարգսյանի հրամանատարությամբ փառքով են կատարել իրենց գործը՝ ամրագրելով փառահեղ հաղթանակներ:

Մենք՝ երկրապահներս, հավատարիմ ԵԿՄ հավերժ նախագահ, Սպարապետ Վազգեն Սարգսյանի պատգամին, հավատարիմ մեր բուն կոչմանն ու առաքելությանը եւ ապավինելով անցած փառավոր ուղուն, ինչպես 90-ականներին, այդպես էլ հիմա նույն ոգով, նույն վճռականությամբ Արցախի ու Հայաստանի Հանրապետության սահմաններում ենք: 2020թ. սեպտեմբերի 27-ի մեզ պարտադրված պատերազմի օրերին համախմբված մարտնչում էինք. այսօր էլ ամուր կանգնած ենք մեր պետության սահմաններում:

Այսօր էլ մեր ժողովուրդը ծանր ու դժվար փորձությունների միջով է անցնում, բայց պատմությունը փաստում է՝ երբ ժողովուրդն է համախմբվել կարողացել է հաղթահարել ծանր փորձությունները: Արցախյան Ազատամարտում մենք մեր սուրբ պարտքը փառքով կատարեցինք համազգային համախմբվածության շնորհիվ: Մենք այսօր էլ պիտի համախմբվենք եւ այնպես ապրենք, այնպիսի ապագա կերտենք, որ արժանի լինենք սուրբ նահատակներին եւ մեր ժողովրդի մաքառումներին:

Իմ խոնարհումը Արցախյան պատերազմում զոհված ազատամարտիկների, Ապրիլյան քառօրյա պատերազմում, 44 -օրյա պետարազմում զոհված քաջերի, զինվորների, մեր մարտական ընկերների, բոլոր զոհված հերոսների հիշատակի առջեւ: Սպարապետ Վազգեն Սարգսյանն ասում էր. «Հեղափոխություն է պետք մեր հոգիներում, մեր գաղափարներում, այլապես ծրագրերն ու կառավարությունները կհաջորդեն մեկ մեկու, իսկ սայլը տեղից չի շարժվի»: Պետք է գիտակցենք, որ ամեն մեկիցս է կախված մեր վաղվա պայծառ ապագան: Այսօր, առավել քան երբեւէ, կարեւոր է հավատքը չկորցնելն ու համազգային համախմբվածությունը:

Սիրելի՛ Երկրապահներ

Երկրապահի օրը առիթ է եւս մեկ անգամ երախտագիտության եւ շնորհակալության խոսքեր հնչեցնելու: Սիրելի երկրապահներ, կամավորներ, զինվորներ, հայրենատեր հայ ժողովուրդ, վստահ եմ, որ մենք միասին հերթական ծանր փորձությունը եւս կհաղթահարենք:
Երախտագիտությունս եմ հայտնում նաեւ բոլոր երիտասարդներին, պատանիներին եւ նրանց ծնողներին, որ գիտակցելով ընդգրկվում են մեր շարքերում:

Այսօր մեծ աշխատանք է ընթանում «Պատանի երկրապահ» ակումբի գործունեության եւ աշխատանքների համար: Հպարտությամբ փաստում եմ, որ մեծ է պատանիների ոգեւորությունը: Այս կառույցի ստեղծման մտահղացումը ԵԿՄ հիմնադիր եւ հավերժ նախագահ, Սպարապետ Վազգեն Սարգսյանինն է: Նա ասում էր, որ հայ երեխան դեռ դպրոցից պետք է ծանոթ լինի իր պատմությանը, իմանա, ինքն ով է, որտեղից է գալիս, ուր է գնում, իմանա՝ ինչ առաքելություն ունի հայ ազգը:

Հարգելի՛ ժողովուրդ

Մայիսի 9-ին նշում ենք Մայիսյան Եռատոնը՝ Շուշիի ազատագրման, Հայրենական մեծ պատերազմի հաղթանակի եւ Արցախի Պաշտպանության Բանակի ստեղծման տարեդարձի օրը: Մայիսը նշանավորվում է հաղթանակների քանակով եւ նշանակությամբ:

Եկեք չկորցնենք հավատքն ու հույսը, համախմբվենք ազգովի եւ կերտենք մեր հայրենիքի լուսավոր ապագան:
Խաղաղություն եմ մաղթում մեր երկրին»։

Աղբյուր` Փաստինֆո