Փաստ ինֆո

44-օրյա պատերազմի սկսվելու, ընթացքի և արդյունքների վերաբերյալ հստակ տեղեկություններ ստանալու համար պետք է իրականացվի քննություն, բայց, պնդում եմ, որ այս իշխանությունների օրոք օբյեկտիվ քննություն իրականացնել հնարավոր չէ: Այս մասին «ԱԱԾ պահեստազորի սպաների միության» մամուլի ասուլիսի ժամանակ ասաց ԱԱԾ նախկին ղեկավար Արթուր Վանեցյանը։

Միությունը հայտարարել էր, որ դեռևս նոյեմբեր ամսին, իշխանությունների նախաձեռնությամբ պետք է ստեղծվեր հանրապետության ամենափորձառու առնվազն 10 քննիչից ու 15 օպերատիվ աշխատակցից բաղկացած, բացառապես այս խնդրով զբաղվող օպերատիվ-քննչական խումբ՝ քննելու պատերազմի հետ կապված հարցերը,ինչը չի արվել։

«Փաստինֆո»-ի դիտարկմանը, որ մեկ քրեական գործի փոխարեն հարուցվել է ավելի քան 1600 քրեական գործ, ինչպես հայտարարել են իշխանությունները։

ԱԱԾ նախկին ղեկավարն ընդգծեց, որ պատերազմի ընթացքի հետ կապված քրեական գործ պետք է հարուցվի, որը պետք է համակողմանի քննի նախապատերազմյան եւ բուն պատերազմի ընթացքին վերաբերող կասկածահարույց հարցերը։

«Մենք տեսնում ենք շատ դեպքեր, երբ բարձրաստիճան զինվորականները բարձրաձայնում են որևէ խնդրի վերաբերյալ, փոխարենը քրեական գործ հարուցվի և զինվորականների կողմից բարձրաձայնված հարցը դառնա քննության առարկա, քրեական գործ են հարուցում զինվորականի նկատմամբ և ասում են՝ պետական գաղտնիք եք հրապարակել:Սա աբսուրդ է: Քրեական գործ պետք է հարուցվի պատերազմի ընթացքի հետ կապված: Նախաքննական մարմինն է այն տեղը, որը պետք է այդ գործը քննի և հարցերի պատասխան ստանա»,-ասաց Վանեցյանը:

Իսկ 1600-ից ավելի քրեական գործի հարուցումը, նրա գնահատմամբ, արդարացված չէ, անհիմն է։

«Եթե լիներ մի գործ, որ իրենից ինչ-որ բան ներկայացներ, դրա մասին հանրությունն արդեն տեղյակ կլիներ, գործերը հարուցված են անհիմն մեղադրանքով: Չեմ ուզում ամբողջի մասին նման գնահատական տալ, բայց այն գործերը, որոնց մասին մենք տեղյակ ենք, անհիմն գործեր են»,-ասաց Վանեցյանը:

ԱԱԾ նախկին ղեկավար Միքայել Համբարձումյանն էլ ավելացրեց՝ «1600 գործը դա խճճվելու պատմություն է, ո՞վ է ի մի բերելու՝ թե վերջում ի՞նչ պարզվեց, միայն թվեր ենք տեսնելու, այդպես չեն անում: Քննությունը պետք է ունենա տակտիկա, ստրատեգիա: Քննչական խմբի ղեկավարը պետք է այդ ամբողջը կազմի պատասխանատու լինի իր կատարած աշխատանքի համար»:

Աղբյուր` Փաստինֆո