Փաստ ինֆո

Գերտերություններն ուշադիր հետևելու են քաղաքական զարգացումներին, որովհետև Հայաստանն աշխարհաքաղաքական և աշխարհատնտեսական առումով բավական կարևոր դիրք է զբաղեցնում տարածաշրջանում։ «Փաստինֆո»-ի հետ զրույցի ժամանակ այս մասին ասաց քաղաքագետ Հրանտ Մելիք-Շահնազարյանը։

Նրա խոսքով՝ պատերազմից հետո Հայաստանի իշխանության որակը և տեսքը կարող են լուրջ ազդեցություն ունենալ տարածաշրջանում ընթացող գործընթացների համար, հետևապես թե՛ Ռուսաստանը, թե՛ ԱՄՆ-ն պետք է ցանկանան Հայաստանում տեսնել համապատասխանաբար պրոռուսական կամ պրոամերիկյան ուժեր։

Հրանտ Մելիք-Շահնազարյանը կարծում է, որ երկու տերություններն էլ այս կամ այն ուժին աջակցելու համար ունեն լուրջ ռեսուրսներ, սակայն երկուսն էլ փորձելու են առավելագույնս քողարկված անել դա. «Ռուսաստանը կարծեք թե խնդիր չունի ո՛չ գործող իշխանության հետ, ո՛չ էլ հնարավոր նոր իշխանությունների, մինչդեռ ԱՄՆ-ն այս տեսակետից լուրջ մտահոգվելու առիթ ունի։ Կարծում եմ՝ ամեն ինչ անելու են խորհրդարանում պրոարևմտյան ուժ տեսնելու համար»,-նշեց քաղաքագետը։

Դիտարկմանը, որ բազմաթիվ փորձագետների կարծիքով առաջիկա ընտրությունները լինելու են Նիկոլ Փաշինյանի կամ Ռոբերտ Քոչարյանի վարչապետության համար, Հրանտ Մելիք-Շահնազարյանը նկատեց՝ երկու գործիչների պարագայում էլ Ռուսաստանն ունի որոշակի խնդիրներ։ Ըստ նրա՝ Նիկոլ Փաշինյանը Ռուսաստանի համար չափազանց անվստահելի գործընկեր է, մասնավորապես աշխարհաքաղաքական փոփոխությունների ժամանակ. «Շատ կուզեն, որ լինի կանխատեսելի, ադեկվատ իշխանություն, որն ամենավճռական պահին Ռուսաստանի շահերի տեսանկյունից որևէ սխալ քայլ չի անի, չի դավաճանի նրանց շահերին։ Նիկոլ Փաշինյանն ընդունակ է նման բաներ անել, Ռուսաստանը բազմիցս ականատես է եղել և այս տեսանկյունից Փաշինյանի հանդեպ մինչև վերջ վստահություն չկա»,-ասաց քաղաքագետը։

Ինչ վերաբերում է ՀՀ երկրորդ նախագահ Ռոբերտ Քոչարյանին, ապա Հրանտ Մելիք-Շահնազարյանը նկատեց՝ նա ռուսամետ լինելուց բացի, Ռուսաստանի քաղաքական ղեկավարության հետ անձնական մտերմություն ունի, ինչը կարող է խնդրահարույց լինել հատկապես այն փուլերում, երբ օրինակ հանուն իրենց շահերի ստիպված կլինեն դեմ դուրս գալ ընկերներին։

«Այս առումով կարծում եմ՝ Քոչարյանի հետ կապված էլ կարող է որոշակի վերապահումներ լինեն։ Չեմ բացառում, որ այլ թեկնածուների էլ կդիտարկեն վարչապետի պաշտոնում։ Կարծում եմ՝ Ռուսաստանը խնդիր չի ունենա, եթե վարչապետի թեկնածու առաջադրվի Արթուր Վանեցյանը։ Նա վերը նշված երկու թեկնածուներին բալանսավորող գործիչ է, որը հիմա ունի նաև ՀՀԿ-ի աջակցությունը»,-ասաց Հրանտ Մելիք-Շահնազարյանը։

Անդրադառնալով Զանգեզուրի հետ կապված հարցին՝ քաղաքագետը նշեց, որ Ռուսաստանը բավականին ակտիվ աշխատում է, որպեսզի տարածաշրջանում բոլոր կոմունիկացիաները բացվեն. «Հնարավոր է՝ որպես հիմնական ուղիներ չեն դիտարկում հենց Զանգեզուրը, քանի որ այդ պարագայում խոսքը վերաբերում է ոչ թե տարածաշրջանային միջանցքի, այլ թուրքական միջանցքի, որի մասին երազում է թուրքական կողմը։ Այս մոտեցումը կարող է Ռուսաստանին դուր չգա, բայց նրանց համար այս պահին կարևոր է բոլոր ճանապարհների բացվելը։ Եթե դա ավելի հեշտ լինի անել Զանգեզուրով, ապա վստահ եմ՝ Ռուսաստանը դեմ չի գնա և ամեն ինչ կանի, որ սկզբնական փուլում ճանապարհը բացվի՝ հետագայում այլ ճանապարհներ բացելու նպատակով։ Պետք է արձանագրենք, որ Ռուսաստանի շահն ամենից առաջ աշխարհաքաղաքական և տնտեսական ուղիների աշխատանքն է և իրենց վերահսկողությունն այդ ուղիների վրա»,-եզրափակեց Հրանտ Մելիք-Շահնազարյանը։

Աղբյուր` Փաստինֆո