Փաստ ինֆո

Կա նախկին զինծառայող, որն անցնում է նման գործով։ Լրագրողների հետ զրույցի ժամանակ ասաց ՀՀ գլխավոր դատախազ Արթուր Դավթյանը՝ անդրադառնալով հարցին՝ արդյոք կա՞ն նախկին բարձրաստիճան պաշտոնյաներ, որոնք անցնում են դավաճանության և լրտեսության գործերով։

«Դավաճանության վերաբերյալ մեկ քրեական գործ արդեն ավարտվել և ուղարկվել է դատարան։ Այն գործերը, որոնք նախաքննության փուլում են, այս պահին ճիշտ չի լինի հրապարակումներ իրականացնել։ Դեռ վաղ է, որ կարողանամ գնահատել կոնկրետ դեպքի ազդեցությունը պատերազմի վերջնական արդյունքի վրա։ Արդեն հրապարակել ենք շուրջ 1650 քրեական գործ։ Յուրաքանչյուր քրեական գործի արդյունքներով, երբ կունենանք իրավական գնահատականներ, կանդրադառնանք դրանց ազդեցությանը պատերազմի ելքի վրա»,-ասաց Արթուր Դավթյանը։

Հարցին՝ ո՞րն է խնդիրը, երբ դատախազությունն ամեն անգամ փորձում է ինչ-որ անձանց տարբեր գործերով ձերբակալել, վերջում դատական համակարգը ոչ իրավաչափ է ճանաչում այդ գործողությունը, Արթուր Դավթյանը նկատեց՝ բացառված է, որ իրենք քաղաքական որոշումներ կայացնենք։ Նա նշեց, որ իրավական գործընթացների բացերն ու թերությունները ներկայացրել է դատախազության հաղորդման մեջ. «Եթե ուսումնասիրեք այն, պարզ կլինեն մեր վերլուծությունները, թե մինչդատական վարույթում ձերբակալումների և կալանավորումների հետ կապված մեր խնդիրները հիմնականում ինչով են պայմանավորված։ Դրանց մի զգալի մասն օրենսդրական խնդիրներով են պայմանավորված, որոշակի մասը պայմանավորված են հատկապես դատական մարմինների կողմից մեզ համար անկանխատեսելի, միջազգային պրակտիկային անհամաչափ, անհամապատասխան մեկնաբանություններ տալով»,-նշեց դատախազը։

Դիտարկմանը՝ արդյոք Սյունիքի գործով քաղաքական որոշում էր դա, Արթուր Դավթյանն ասաց, որ քաղաքական որոշման մասին խոսք լինել չի կարող։ Վերջինս նշեց, որ յուրաքանչյուր քաղաքացի կարող է նայել Սյունիքում կատարված դեպքը և հասկանալ՝ դրա վերաբերյալ քրեական հետապնդումն արդարացվա՞ծ է, թե՞ ոչ. «Սյունիքի դեպքերով դատարանների կողմից տրված գնահատականների ճնշող մեծամասնության հետ համաձայն չենք եղել և հիմա դրանք վիճարկում ենք վերադաս դատարանում»,-նշեց գլխավոր դատախազը։

Աղբյուր` Փաստինֆո