Փաստ ինֆո

Նիկոլ Փաշինյանն արել է հայտարարություն եւ հիմա դատարանում հայցվորից ցանկանում է պարզել՝ իր հայտարարությունները ճիշտ են, թե ոչ։ «Փաստինֆո»-ի հաղորդմամբ՝ այս մասին Երևանի ընդհանուր իրավասության դատարանում «Ռոբերտ Քոչարյանն ընդդեմ Նիկոլ Փաշինյանի» գործով դատական նիստին ասել է հայցվոր կողմի ներկայացուցիչ Հայկ Ալումյանը՝ նշելով, որ դատարան չի եկել, որ Նիկոլ Փաշինյանի ներկայացուցիչն իրեն հարցնի՝ Նիկոլ Փաշինյանը ճի՞շտ է խոսել, թե՞ սուտ։

Նշենք, որ Նիկոլ Փաշինյանի ներկայացուցիչ Գևորգ Գյոզալյանը հարց էր ուղղել Ալումյանին, թե Ռոբերտ Քոչարյանը 1998-2008թթ միայն աշխատավարձո՞վ է հոգացել իր և ընտանիքի հոգսերը։ Գյոզալյանը հայտարարել էր, թե իր վստահորդն ունեցել է անհերքելի փաստեր, որի հիման վրա ինքը կառուցել է իր ելույթը, այսինքն՝ եղել են գնահատողական դատողություններ։ Նախագահող դատավոր Սուքոյանը հեռացրեց հարցը՝ պատասխանողին հիշեցնելով, որ հայցի առարկան զրպարտությունն է, որտեղ կան կոնկրետ արտահայտություններ, մասնավորապես՝ «թալանված» բառը, այլ ոչ թե՝ այլ եկամուտներ ունենալը։ Պատասխանողի ներկայացուցիչն առարկեց դատարանի գործողությունների դեմ։

Հայցվոր կողմի ներկայացուցիչ Հայկ Ալումյանն էլ հայտարարությամբ հանդես եկավ՝ նշելով, որ զրպարտության վերաբերյալ գործերով պատասխանողի կողմից հրապարակված հանգամանքների ապացուցման բեռը կրում է պատասխանող կողմը, մինչդեռ այս դեպքում ստացվում է, որ պատասխանող կողմը՝ Նիկոլ Փաշինյանը, ցանկանում է պարզել՝ այդ հայտարարությունը ճիշտ է, թե ոչ։

Ալումյանի խոսքով՝ հայտարարություններն այլ անձանց վերաբերյալ պետք է արվեն հակառակ տրամաբանությամբ, ոչ թե հայտարարել, հետո դատարանում փորձել պարզել՝ ճիշտ է, թե ոչ, այլ՝ ճշտել և հետո միայն հայտարարություններ անել։

Գյոզալյանն էլ արձագանքեց՝ նշելով, թե իր վստահորդի պնդմամբ՝ հանրահայտ հանգամանք է, որ կողմը, զբաղեցնելով նախագահի բարձրագույն պաշտոնը, հարստացել է։

«Մենք խնդիր ունենք դատարանին ցույց տալու, որ ժողովրդից թալանված գումարները տեղ ունեն մեր իրականության մեջ»,- նշեց Գյոզալյանը։

Ինչպես արդեն տեղեկացրել ենք՝ 2020թ ապրիլին ՀՀ երկրորդ նախագահ Ռոբերտ Քոչարյանը հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու և զրպարտությամբ պատճառված ոչ նյութական վնասի հատուցման պահանջով՝ 2 մլն դրամի չափով։ Հայցադիմումի հիմք էր հանդիսացել սահմանադրական բարեփոխումների վերաբերյալ քարոզարշավի ժամանակ Նիկոլ Փաշինյանի հայտարարություններն առ այն, որ 4 մլրդ դոլարով պետք է ավելանա պաշտպանության բյուջեն, որից 1,2 մլրդը պետք է վերադարձվի թալանված գումարը և այդ հայտարարության ժամանակ հնչել է Ռոբերտ Քոչարյանի անունը: Հայցվոր կողմը գտնում է, որ այդ հայտարարությամբ խախտվել է Ռոբերտ Քոչարյանի անմեղության կանխավարկածը։

Այսօր կայացած դատական նիստին Ռոբերտ Քոչարյանի ներկայացուցիչ Հայկ Ալումյանը, անդրադառնալով փոխհատուցման պահանջի չափին, նշեց, որ կարող էին նաև 1 լումա նշել, քանի որ կարևոր է, որ դատարանն արձանագրի, որ պատասխանողը զրպարտել է, բայց հասկացել են, որ, եթե պատասխանողն իր գրպանից գումար չտա, նա շարունակելու է նույնկերպ։ Հայցվոր կողմը 2 մլն դրամ է պահանջել՝ հաշվի առնելով հայտարարությունների տարածվածության աստիճանը և այն հանգամանքը, որ այդ հայտարարություններն անելիս շատերի մոտ պատասխանողի խոսքը հեղինակավոր էր։

Դատական նիստը մի քանի ամսով հետաձգվեց։ Հաջորդ դատական նիստը կկայանա սեպտեմբերի 14-ին, որի ընթացքում կբաշխվի ապացուցման բեռը, կողմերը դիրքորոշումներ կներկայացնեն։

Հեղինակ՝ Իզաբել Սահակյան

Աղբյուր` Փաստինֆո