Փաստ ինֆո

Օնիկ Գասպարյանն իր պատասխանատվության ոլորտում նորմալ հաջողություններ չունենալու դեպքում սկսել է այլ հարցերով զբաղվել։ Լրագրողների հետ զրույցի ժամանակ այս մասին ասաց ՀՀ անվտանգության խորհրդի քարտուղար Արմեն Գրիգորյանը։

«Նույնիսկ փետրվարի 25-ի իր հայտարարության մեջ Օնիկ Գասպարյանը և մնացած գեներալները հայտարարում էին, որ արտաքին քաղաքականության հետ կապված խնդիրներ կային, մինչդեռ դա զինված ուժերի լիազորության մեջ չի մտնում։ Զինված ուժերի լիազորությունը հստակ է»,-նշեց ԱԽ քարտուղարը։

Դիտարկմանը, որ տարակուսելի է, երբ ԳՇ պետը սուտ բան է ասում և քաղաքական իշխանությունը թույլ է տալիս, որ դրանից հետո նա շարունակի ղեկավարել Հայաստանի բանակը, Արմեն Գրիգորյանը նկատեց՝ եթե հաշվի առնենք, որ Հայաստանում եղել են հետպատերազմական, ներքաղաքական գործընթացներ իրենք գնացել են լուծման այս տարբերակով. «Այստեղ կարևորն այն է, որ հարցը վերջնականապես քաղաքական առումով լուծված է»։

Հարցին՝ արդյոք կիսում է Նիկոլ Փաշինյանի արտահայտած բոլոր մտքերը և քաղաքական հայտարարությունները, ԱԽ քարտուղարը նշեց, որ ինքն առաջնորդվում է նրա հայտարարություններով։

Անդրադառնալով ՀՀ առաջին նախագահ Լևոն Տեր-Պետրոսյանի այն հայտարարությանը, որով ՀՀ երկրորդ և երրորդ նախագահներին կոչ էր արել միանալ, ԱԽ քարտուղարն ասաց. «Հետաքրքիր է, որ պատերազմի ընթացքում էլ է նման հանդիպման ֆորմատ եղել, և նրանք ցանկանում էին համատեղ ինչ-որ նախաձեռնություն անել։ Այդ ժամանակ մեղադրեցին վարչապետին, որ չստացվեց իրենց համագործակցությունը։ Կարծում եմ՝ խնդիրը որևէ մեկ անձ չէ այդ եռյակից դուրս, այլ հենց իրենք են։ Իրենց անհաջողությունները միշտ փորձելու են ուրիշների վրա բարդել։ Մոտակա ընտրություններում հենց ժողովուրդն է իրենց գնահատական տալու»,-ասաց Արմեն Գրիգորյանը։

Աղբյուր` Փաստինֆո