Փաստ ինֆո

ԱԱԾ-ն հաստատել է, որ Նիկոլ Փաշինյանի օգնական Աննա Վարդապետյանը հանդիպումներ և քննարկումներ է ունեցել քննիչների հետ։ Հաստատվել են նաև քննիչների հանդիպումները ԲԴԽ անդամ Գագիկ Ջհանգիրյանի հետ։ Ըստ ԱԱԾ-ի՝ քննիչներից մեկը գնացել էր շնորհավորելու Ջհանգիրյանին, մյուսը՝ ինչ-որ հակակոռուպցիոն վիճակագրություն տալու համար։ Այս մասին «Փաստինֆո»-ի հետ զրույցում ասաց փաստաբան Ամրամ Մակինյանը։

Ինչպես արդեն տեղեկացրել ենք՝ թելեգրամյան ալիքներով տարածվել էր ձայնագրություն, համաձայն որի՝ Երևան քաղաքի քննչական վարչության ծանր հանցագործությունների բաժնի պետ Արմեն Մարգարյանի տեղակալ Արման Աբրահամյանը մոտ երկու ամիս առաջ ձայնային հաղորդագրություն է ուղարկել նախկին պաշտոնյաների վերաբերյալ քրեական գործիչը քննող քննիչներին՝ տեղեկացնելով, որ Նիկոլ Փաշինյանի խորհրդական Աննա Վարդապետյանը կրկին գնալու է քննչական մարմին։ Այսօր հայտնի դարձավ, որ ԱԱԾ-ն մերժել է քրեական գործի հարուցումը՝ ձայնային հաղորդագրությունների վերաբերյալ։

Հիշեցնենք, որ դրան նախորդել էր Աննա Վարդապետյանի կողմից ՀՖՖ նախկին նախագահ Ռուբեն Հայրապետյանի և որդու՝ Ռաֆիկ Հայրապետյանի գործով առերևույթ ապօրինի միջամտություն կատարելու վերաբերյալ տեսագրությունը, որով եւս ԱԱԾ-ն մերժել էր քրեական գործ հարուցել՝ պատճառաբանելով, թե Փաշինյանի օգնականը որպես փորձագետ է ծանոթացել քննիչի որոշումների հետ եւ խմբագրել դրանք։

Փաստաբան Ամրամ Մակինյանը «Փաստինֆո»-ի հետ զրույցում նշեց, որ իրենց համար կարևորն այն է, որ բոլոր այն փաստերը, որոնք ապացուցման կարիք ունեն, դրանք ԱԱԾ-ն ապացուցել է, մնացածը՝ տեխնիկական հարցեր են։

Ըստ նրա՝ պատրաստվում են քրեական գործի հարուցումը մերժելու մասին որոշման դեմ բողոք ներկայացնել։

«Մեծ ակնկալիքներ ունեմ դատախազությունից, որ ՀՀ դատախազությունը չի կարող այս որոշումն անտեսել»,- նշեց Մակինյանը՝ հավելելով, որ անհրաժեշտության դեպքում դատարան ևս բողոք կներկայացվի։

Ինչ վերաբերում է Փաշինյանի օգնական Աննա Վարդապետյանին՝ որպես «փորձագետ ներգրավվելուն», Մակինյանը նշեց, որ նման ընթացակարգ քրեական դատավարությունում չկան և չեն էլ կարող լինել, իրավական հարցերով փորձագետներ չեն ներգրավվում։

Ինչպես արդեն արձանագրեցինք՝ սա Աննա Վարդապետյանի վերաբերյալ արդեն երկրորդ վարույթն է, Ամրամ Մակինյանը սպասում է երրորդին, կարծում է՝ նոր ձայնագրություններ կհրապարակվեն։

«Իմիջիայլոց՝ քննիչին խոստացել էի։ Ինձ հարց տվեցին՝ Դուք տեղեկություն ունե՞ք արդյոք, թե ձայնագրությունն ինչպես է հրապարակվել լրատվամիջոցների մոտ, ասեցի՝ այո, ես ունեմ, հարուցեք՝ կասեմ։ Չհարուցեցին, ես էլ չեմ ասում»,- նշեց Մակինյանը։

Հեղինակ՝ Իզաբել Սահակյան

Աղբյուր` Փաստինֆո