Փաստ ինֆո

Երևանի ընդհանուր իրավասության դատարանում՝ դատավոր Ալեքսեյ Սուքոյանի նախագահությամբ, մեկնարկել է ՀՀ երկրորդ նախագահ Ռոբերտ Քոչարյանն ընդդեմ Նիկոլ Փաշինյանի գործով դատական նիստը։

Ինչպես արդեն տեղեկացրել ենք՝ 2020թ ապրիլին ՀՀ երկրորդ նախագահ Ռոբերտ Քոչարյանը հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու և զրպարտությամբ պատճառված ոչ նյութական վնասի հատուցման պահանջով՝ 2 մլն դրամի չափով։ Հայցադիմումի հիմք էր հանդիսացել սահմանադրական բարեփոխումների վերաբերյալ քարոզարշավի ժամանակ Նիկոլ Փաշինյանի հայտարարություններն առ այն, որ 4 մլրդ դոլարով պետք է ավելանա պաշտպանության բյուջեն, որից 1,2 մլրդը պետք է վերադարձվի թալանված գումարը և այդ հայտարարության ժամանակ հնչել է Ռոբերտ Քոչարյանի անունը: Հայցվոր կողմը գտնում է, որ այդ հայտարարությամբ խախտվել է Ռոբերտ Քոչարյանի անմեղության կանխավարկածը։

«Փաստինֆո»-ի հաղորդմամբ՝ դատական նիստի ընթացքում հայցվոր կողմից ներկայացուցիչ Հայկ Ալումյանը հայցադիմումի հիմքերը ներկայացնելիս ընդգծեց, որ Նիկոլ Փաշինյանը վիճարկվող հայտարարությունն անելիս գտնվել է արձակուրդում։ Ալումյանը նաև արձանագրեց, որ փաստերն այս գործով չեն վիճարկվում, պատասխանող կողմը չի ժխտում, որ պարոն Քոչարյանն այդ պահին ունեցել է մեղադրյալի կարգավիճակ, չի ժխտում, որ պատասխանողն արել է այս հայտարարություններ, ինչն անմիտ կլիներ, որովհետև այն տարածվել էր՝ ԶԼՄ-ներով։

Նիկոլ Փաշինյանի ներկայացուցիչ Գևորգ Գյոզալյանի հարցին, թե արդյոք ընդունում է փաստը, որ և՛ պատասխանող կողմը, և՛ հայցվորը քաղաքական գործիչներ են, Ալումյանը նշեց. «Այն, որ իմ վստահորդը քաղաքական գործիչ է՝ իհարկե ես դա ընդունում եմ, դա անմիտ կլիներ որևէ ձևով ժխտել։ Ինչ վերաբերում է Նիկել Փաշինյանին, ես չգիտեմ, հավանաբար...»։

Ալումյանը ևս մեկ անգամ, ընդգծեց, որ Նիկոլ Փաշինյանն այդ հայտարարությունն արել է՝ գտնվելով արձակուրդում՝ որպես մասնավոր անձ, իսկ որպես Հանրապետության վարչապետ անելու դեպքում հայցվոր կողմի պահանջը շատ ավելի մեծ կլիներ և գումարի, և խախտված իրավունքի առումով, քանի որ ՀՀ անունից խախտվել է անմեղության կանխավարկածի սկզբունքը։

Ալումյանի դիտարկմամբ՝ իր համար հասկանալի չէ, թե ինչու է պատասխանող կողմի ներկայացուցիչը կարևորում՝ պատասխանողը (Նիկոլ Փաշինյանը) քաղաքական գործիչ է, թե ոչ։ «Ձեր վստահորդը քաղաքական գործիչ է։ Եթե իր քաղաքական գործիչ լինել-չլինելու փաստն այդաստիճան կախված է նրանից՝ ես կընդունեմ, թե ոչ, կասեմ՝ այո, քաղաքական գործիչ է։ Եթե իմ խոսքից ինչ-որ առումով դա կախված է, ընդունեք այդպես»։

Ինչ վերաբերում է պատասխանողի դիտարկմանը, որ Փաշինյանի՝ սույն հայտարարություններն արվել են քարոզարշավի ընթացքում, Ալումյանը նշեց, որ դժվարանում է պատկերացնել, թե ինչպես կարող է ՍԴ կազմի վերաբերյալ հանրաքվեի հետ կապված քարոզարշավի շրջանակներում լինել այն, ինչ պատասխանողն ասել է։

«Ձեր վստահորդը սա ասել է քարոզարշավի ընթացքում, բայց քարոզարշավի նյութի, նպատակների հետ բացարձակապես չկապված»,- նշեց Ալումյանը։

Հեղինակ՝ Իզաբել Սահակյան

Աղբյուր` Փաստինֆո