Փաստ ինֆո

Այն, ինչ տեղի է ունենում առանց սահմանազատման, առանց ճիշտ և ընդունելի իրավական կանոնների և Ադրբեջանի կողմից մեր տարածքների հաշվին GPS-ով առաջխաղացման, մարդկանց մոտ հարց է առաջացնում՝ ո՞վ է պատասխանատու և ինչու՞ այսպես եղավ։ Աժ-ում այս մասին ասաց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ՀՀ մարդու իրավունքների պաշտպան Արման Թաթոյանին։

Պատգամավորը նշեց, որ այս հարցի պատասխանատուները, մասնավորապես իշխանությունը նշում են, որ այն, ինչ այսօր կատարվում է մեր սահմաններին, տեղի չի ունեցել արցախյան պատերազմից հետո, այլ այդ հարցը որոշվել էր դեռևս 2010թ.-ին «Վարչատարածքային բաժանման մասին» օրենքում փոփոխություններ կատարելով։

Մարդու իրավունքների պաշտպանը նշեց՝ փաստ է, որ զինված հարձակումների հետևանքով, հետպատերազմական իրավիճակում սահմանամերձ բնակիչների իրավունքները կոպտորեն խախտվել և լրջորեն վտանգվել են.

«Համաձայն չեմ այն դիրքորոշման հետ, որ վարչատարածքային բաժանման մասին օրենքը բերվում է որպես փաստարկ։ Այդ օրենքը վերաբերում է մարզերին ու համայնքներին։ Պետական սահմանի հետ կապված հարցերը կարգավորվում են պետական սահմանի մասին օրենքով։ Ընդ որում վարչատարածքային բաժանման մասին օրենքով սրանք ընդամենը վարչատարածքային միավորների միջև բաժանումներ են, բայց ոչ երկրի պետական սահման։ Սրա ապացույցն է նաև այն, որ սահմանային շերտը, որը 1կմ է, պետական սահմանի մասին օրենքը նախատեսում է, որ դա սահմանապահ զորքերի խնամքին է հանձնվում, և սահմանապահ զորքերը նաև կարող են այնտեղ թույլտվություններ տալ։

Եթե այդպես է, նշանակում է՝ սահմանային բնակավայրերի բնակիչների մուտքի ու ելքի իրավունք հո չեն տալիս սահմանապահ զորքերը։ Մենք ասում ենք չկա սահմանազատում և սահմանագծում, հետո մյուս կողմից մեջբերում ենք վարչատարածքային բաժանման մասին օրենքը, նշանակում է՝ մեր սահմանային բնակավայրերը, համայնքների սահմանները չգիտե՞նք։ Հետևաբար ստացվում է՝ մենք նույնացնում ենք սամանազատումը, սահմանագծումը վարչատարածքային բաժանման սահմանագծումների հետ»,-ասաց Արման Թաթոյանը։

Աղբյուր` Փաստինֆո