Փաստ ինֆո

Մեդիատեռորի մեջ ե՞ք մեղադրում մարդու իրավունքների պաշտպանին։ Լուրջ ե՞ք ասում։ Այս մասին ասաց ՀՀ մարդու իրավունքների պաշտպան Արման Թաթոյանը՝ դիմելով «Իմ քայլը» խմբակցության պատգամավոր Մարիա Կարապետյանին։

Նշենք, որ վերջինս իր ելույթում ասել էր, որ իրենց «ժողովրդավար իշխանության» շնորհիվ է ՄԻՊ-ը ձեռք բերել միջազգային «A» կարգավիճակ, ինչպես նաև անդրադարձել ՄԻՊ-ի՝ սահմանազատման վերաբերյալ հայտարարություններին՝ փաստացի դժգոհելով կառույցից։

Արման Թաթոյանը նկատեց՝ պատերազմից հետո մարդիկ գտնվում էին տեղեկատվական բլոկադայի մեջ. «Պետությունը որդեգրել էր չափազանց սխալ քաղաքականություն, անընդհատ ասում էին՝ ոչ մի բան տեղի չի ունենում, ամեն ինչ նորմալ է։ Արդյունքում ամբողջը գալիս լցվում էր ապատեղեկատվությամբ։ Ադրբեջանական զինվորականները գյուղեր են եկել, մարդիկ շոկի մեջ են հայտնվում։ Պետությունը ոչ միայն նրանց հետ աշխատանքներ չի տանում, այլև հայտարարում է, որ ամեն ինչ նորմալ է։ Հայաստանի քաղաքացիները պետք է մի ուղղությամբ աշխատեն, ոչ թե փոխադարձ մեղադրանքներ հասցնեն։ Ադրբեջանի նպատակն է ամբողջ աշխարհին ասել, որ ոչ մի խնդիր չկա, ամեն ինչ հիանալի է։ Կասեն, որ Հայաստանն էլ է ասում՝ ամեն ինչ նորմալ է։ Բա հետո՞, պետությունը ոչինչ չի անում ու մեղադրում է մեդիատեռորի մեջ»,-նշեց Արման Թաթոյանը։

Վերջինս անդրադարձավ Հանրային հեռուստաընկերությանը, նշելով, որ այն դատապարտելի վարքագիծ է ցուցաբերում. «Հատուկ մոնիթորինգ ենք արել։ Սյունիքի հետ կապված իմ հայտարարություններից համարյա ոչ մի բան չեն լուսաբանում։ Ամբողջությամբ դարձել են իշխանության մարմինների քարոզիչ։ Հենց այս պահին ու այս ամբիոնից զգուշացնում եմ Հանրային հեռուստատեսությանը որպես հանրային ֆինանսավորում ստացող մարմնի, որ նրանք անաչառ ինֆորմացիա տրամադրող են, այլ ոչ թե մարդու իրավունքների պաշտպանի տեղեկություններն աղավաղող»,-նշեց Արման Թաթոյանը։

Մարդու իրավունքների պաշտպանը նշեց, որ իշխանական պատգամավորի ելույթում կային բացահայտ մանիպուլատիվ հայտարարություններ. «Իսկ դուք ի՞նչ գիտեք, որ մենք Արտաքին գործերի նախարարության հետ չենք աշխատել։ Մենք ամեն օր ենք մեր գործընկերների մեջ կապի մեջ։ Տիկին Կարապետյա՛ն, ես միամիտ չեմ և բացահայտ հասկանում եմ՝ ինչ է տեղի ունենում։ Որևէ քայլ չեմ անում, որը կհակասի մեր երկրի արտաքին քաղաքականությանը։ Ես ասում եմ՝ ադրբեջանցիները սպառնում են, կադաստրային փաստաթուղթ ունեցող մեր բնակիչները զրկվել են իրենց հողատարածքներից, դուք ինձ ասում եք՝ ամսի 15-ին ասել ես սահմանազատում բառը, ամսի 17-ին՝ սահմանագծում բառը։ Բա դա եղա՞վ, դա ՀՀ քաղաքացու իրավունքների պաշտպանություն է՞։ Դուք գնացել ե՞ք Գորիսից Շուռնուխ կամ Կապանից Ճակատեն գնացող հատվածը։ Օրինակ եթե ավտովթար լինի, ադրբեջանցիները գան, ի՞նչ է լինելու։ Դուք էլ ասում եք ձայն մի հանի։ Նման միջադեպ ամեն օր կարող է տեղի ունենալ։ Հարց տվել ե՞ք, եթե քաղաքացու հետ նման դեպք լինի, դուք ո՞նց եք գնալու նրա իրավունքները պաշտպանեք, կկարողանա՞ք պաշտպանել։ Տանելու են ձերբակալեն որպես գերի դարձնե՞ն։ Մենք պետք է ջուր չլցնենք Ադրբեջանի ջրաղացը, մեր ամեն բառը պետք է կշռադատված լինի, իսկ իմ խոսքը կշռադատված է»,-ասաց Արման Թաթոյանը։

Աղբյուր` Փաստինֆո