Փաստ ինֆո

ԱԱԾ-ն ՀՀ ԶՈՒ ԳՇ նախկին պետ, գեներալ-գնդապետ Մովսես Հակոբյանին մեղադրանք է առաջադրել պետական գաղտնիք հրապարակելու հատկանիշներով՝ այդ կերպ հաստատելով, որ պատերազմի ընթացքում բարձրաստիճան պաշտոնյաների կողմից առերևույթ հանցագործության դեպքերի վերաբերյալ գեներալ-գնդապետի հայտարարությունները համապատասխանում են իրականությանը։ Այսինքն՝ նրան մեղադրանք է առաջադրվել ոչ թե սուտ մատնության, զրպարտության համար, այլ պետական գաղտնիք պարունակող տեղեկություններ հրապարակելու։ Սրան զուգահեռ ՀՔԾ-ն խուսափել է իրավական գնահատական տալ Հակոբյանի հայտարարություններին, որոնք գաղտնազերծում են պաշտոնյաների կողմից թույլ տրված առերեւույթ չարաշահման դեպքերը։

Մովսես Հակոբյանը «Փաստինֆո»-ի հետ զրույցում, այդ հանգամանքին անդրադառնալով, նշեց. «Տրամաբանորեն Դուք շատ ճիշտ եք մտածում, բայց կարծում եմ՝ դա քննիչների գործն է՝ ում մեղադրանք առաջադրեն»։

Հարցին՝ ՀՔԾ-ն պատշաճ քննություն չի իրականացնում, Հակոբյանը նշեց՝ իրենց գործն է, ինչ ուզում են՝ թող անեն։

Հիշեցնենք, որ Արցախյան երրորդ պատերազմի ավարտից հետո՝ նոյեմբերի 19-ին հրավիրված մամուլի ասուլիսի ընթացքում Մովսես Հակոբյանը աղմկահարույց հայտարարություններ էր արել՝ նշելով, որ պատերազմի երրորդ օրը վարչապետը կանգնեցրել է բանակի լրահամալրումը և հանձնարարել առաջնագիծ ուղարկել կամավորականներին: Նա ընդգծել էր, որ իր խոսքերը որևէ մեկը հերքել չի կարող, քանի որ կան ձայնագրություններ։ Ասուլիսում հնչեցված հայտարարությունների առթիվ ՀՔԾ-ում հարուցվել է քրեական գործ՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով, այն է՝ պաշտոնեական լիազորությունների չարաշահումը: Նույն քրեական գործի շրջանակներում քննության առարկա են իշխանությունների կողմից առերևույթ պետական դավաճանության, ՀՀ տարածքային ամբողջականության խախտման մասին հաղորդումները, որի շրջանակներում հարցաքննվել է ՀՀ ԶՈՒ ներկայիս ԳՇ պետ Արտակ Դավթյանը, նախկին նախարար Դավիթ Տոնոյանը եւ այլ զինվորականներ։

Նշված քրեական գործը քննվում է շուրջ վեց ամիս, սակայն առ այսօր որևէ պաշտոնյայի դեռևս մեղադրանք չի առաջադրվել, միևնույն ժամանակ՝ գործ չի հարուցվել սուտ մատնություն կատարելու հատկանիշներով, փոխարենը՝ երեկ հայտնի դարձավ, որ Մովսես Հակոբյանին մեղադրանք է առաջադրվել ԱԱԾ-ում քննվող քրեական գործով՝ պետական գաղտնիք պարունակող տեղեկություն հրապարակելու համար։

Աղբյուր` Փաստինֆո