Փաստ ինֆո

Մենք որպես քաղաքացիներ,  ընդունել ենք Սահմանադրություն, ընդունել ենք օրենքներ և ուզում ենք ապրել մեր երկրի օրենքներով: Ձեզ ո՞վ է թույլ տվել խախտել մեր երկրի օրենքներն ու օրինական հասարակական տրամաբանական կարգը։ Դուք ձեզ դրել եք եսիմ ում տեղը։ Այս մասին լրագրողների հետ զրույցում ասաց ՍԴ աշխատակազմի նախկին ղեկավար Էդգար Ղազարյանը, խոսքն ուղղելով Աժ պատգամավորներին:

«Պատգամավորներն ընդամենը հանրային ծառայողներ են, որոնք պարտավոր են իրենց պաշտոնական լիազորությունների շրջանակներում գործողություններ իրականացնել: Դուք պարտավոր եք գործողություններ իրականացնել, ոչ թե՝ չիրականացնել։ Ձեզ բերել ենք իշխանության, որպեսզի անեք այն, ինչ այդ պաշտոնը զբաղեցնող անձը պարտավոր է անել»,- ասաց ՍԴ աշխատակազմի նախկին ղեկավարը հայտարարելով, որ ժամանակին զբաղեցնելով բարձր պաշտոններ՝ Վայոց Ձորի մարզպետ,  Լեհաստանում Հայաստանի դեսպան, ՍԴ աշխատակազմի ղեկավար և այլն, երբեք չի կարծել, որ կարող է անել այն, ինչ ուզում է, փոխարենն արել է այն՝ ինչ պարտավոր էր անել։  

«Ես՝ ինձ հաշվետու եմ զգացել ՀՀ յուրաքանչյուր անձի առաջ: Եվ հիմա լինելով ՀՀ քաղաքացի, ոչ միայն իրավական, այլ նաև բարոյական իրավունք ունեմ պահաջելու ցանկացած պաշտոնատար անձից, որպեսզի նա Հայաստանի բոլոր քաղաքացիներին պատշաճ բացատրություններ տա իր որոշումների սահմանադրականության, օրինականության և տրամաբանության հետ կապված»,- ասաց Ղազարյանը:

Էդգար Ղազարյանի կարծիքով, այսպիսով երկիրը վերածվում է «ծիծաղի առարկայի»։ Նա  անտրամաբանական  է դիտարկում կիրակի օրը հրաժարական տված վարչապետին հաջորդ օրը՝ կրկին որպես թեկնածու, առաջադրելու որոշումը։    

«Սա խեղկատակութուն է։  ՀՀ արժանապատիվ  քաղաքացին չպետք է թույլ տա, որ իր հետ այսպես վարվեն: Ազգային Ժողովը պետք է ընտրի վարչապետ, քանի որ վարչապետի պաշտոնը զբաղեցնողը հրաժարական է տվել: Մենք ամեն քայլափոխի հանդիպում ենք անտրամաբանական, անօրինական գործընթացների: Ես որպես քաղաքացի չեմ հաշտվում այս իրողությունների հետ: Ես քաղաքական որևէ ուժի չեմ հարում, որևէ պաշտոնի հավակնություններ չունեմ և իմ նախաձեռնությունը քաղաքացիական է»,-եզրափակեց Ղազարյանը:

Աղբյուր` Փաստինֆո