Փաստ ինֆո

Պետք է գնալ ոչ թե խորհրդարանական արտահերթ  ընտրությունների, այլ արդեն գործող   խորհրդարանը  պետք է ընտրի նոր վարչապետ: Այս մասին լրագրողների հետ զրույցում ասաց ՍԴ աշխատակազմի նախկին ղեկավար Էդգար Ղազարյանը:

Նա նկատեց, որ եթե Գագիկ Ծառուկյանը կամ Էդմոն Մարուքյանը չեն ցանկանում լինել պատգամավոր, կարող են վայր դնել իրենց մանդատները, ինչը նույնպես մեր օրենսդրությունը նախատեսում է:

«Կուսակցության հերթական համարի պատգամավորի թեկնածուն կընտրվի պատգամավոր և կկատարի այն ֆունկցիոնալ պարտականությունները, որոնք պետք է կատարեն պատգամավորները»,-բացատրեց Էդգար Ղազարյանը:

ՍԴ աշխատակազմի նախկին ղեկավարի արձանագրմամբ,  Սահմանադրության այն դրույթը, որ երկու անգամ վարչապետ չընտրելուց հետո խորհրդարանը լուծարվում է, դա ոչ թե ինքնալուծարման ինստիտուտ է, այլ ծայրահեղ դեպք, բացառիկ քաղաքական տարաձայնությունների  անորոշության պայմաններում քաղաքական հանգուցալուծումներ գտնելու համար: Ըստ Էդգար Ղազարյանի,  այս իրավիճակում նման խնդիր առկա չէ, հաշվի առնելով, որ  խորհրդարանը գտնվում է կազմակերպվածության գերաբարձր մակարդակում:

«Դա վերաբերվում է ոչ միայն «Իմ քայլը» կուսակցությանը, այլ ըստ էության նաև ընդդիմադիր երկու ուժերին: Այսինքն, այսօր այս պահին նախկին վարչապետը փաստացի ղեկավարում է ողջ պարլամենտը: Այսօր լեգիտումության տակ է դրված մեր խորհրդարանը, քանի որ մեր երկրի օրենսդրությամբ Ազգային Ժողովի առնվազն 30% պետք է լինի ընդդիմություն: Բայց այսօր ընդդիմադիր ուժերը իշխանության հետ եկել են համաձայնության և դարձել են մեկ միասնական թիմ: Այսինքն, այս պահին մեր պարլամենտում ընդդիմություն գոյություն չունի ,- եզրափակեց Ղազարյանը:

Աղբյուր` Փաստինֆո