Փաստ ինֆո

Առ այսօր իշխող խմբակցության շատ պատգամավորներ, գործադիր իշխանության ներկայացուցիչներ առիթը բաց չէին թողնում՝ ընդգծելու հնարավոր բարեկամությունը, անգամ խոսքում ասում էին՝ «հարմար առիթ է հայ-ադրբեջանական բարեկամություն հաստատելու համար»։ Դա ուղղակիորեն հակասում էր մեր պետական քաղաքականությունը, որն ըստ էության պետք է վերբարձրացներ Ադրբեջանի հայատյաց քաղաքականությունը, թուրք-ադրբեջանական տանդեմի ցեղասպան քաղաքականության շարունակականությունը, որն արտահայտվում էր էթնիկ զտումներով, քաղաքացիական բնակչության սպանություններով, գերիների խեղումներով, սպանությամբ, նրանց պատանդ պահելով։ Այս մասին լրագրողների հետ զրույցում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը։ 

Սիմոնյանն ընդգծեց՝ դրանք մարդկության դեմ ուղղված պատերազմական հանցագործություններ են և նման գործողություններ իրականացնող պետության հետ որևէ բարեկամական կապեր հաստատելու հնարավորություն չէր լինի։

Ինչ վերաբերում է Հրաչյա Հակոբյանի հայտարարությանը, թե վերջիններս պետք է ընտրեն երրորդ ճանապարհը, զբաղվում են պոպուլիզմով, Սիմոնյանը նշեց. «Ժողովուրդ ջան, ով գիտի ինչ է խոսում և ինչի համար է խոսում։ Իրենք են ամբողջ օրը պոպուլիզմով զբաղված, դուք վստա՞հ եք, որ ես, օրինակ, մասնակցելու եմ ընտրություններին, որ նախընտրական քարոզարշավ եմ իրականացնում։ Եթե ինչ-որ բան չգիտեն՝ թող հայտարարություններ չանեն»։

Սիմոնյանն ընդգծեց, որ ինքը պահում է պետական քաղաքականությունը, անկախ նրանից, թե իշխող ուժն ով կլինի, պետությունը պետք է հստակ քաղաքական գիծ ունենա և ցեղասպան քաղաքականություն վարող պետությունների հետ բարեկամության մասին չխոսի՝ մինչև նրանց ռազմաքաղաքական ղեկավարության ներկայացուցիչներին չբերի պատասխանատվության դաշտ։

Աղբյուր` Փաստինֆո