Փաստ ինֆո

Ես շատ մեծ կասկածներ ունեմ, որ Նիկոլ Փաշինյանը առհասարակ պատվաստվել է: Այս մասին «Փաստնիֆո»-ի հետ զրույցում ասաց «Պարացելսուս» հասարակական կազմակերպության նախագահ, բժիշկ Նունե Ներսիսյանը:

Նշենք, որ այսօր առավոտյան Հայաստանի վարչապետի պաշտոնակատար Նիկոլ Փաշինյանը հայտարարեց, որ կնոջ՝ Աննա Հակոբյանի հետ, պատվաստվել են կորոնավիրուսի դեմ: Սակայն, Ազգային Ժողովում նա հրաժարվեց ասել, թե որ պատվաստանյութով է պատվաստվել։ Փոխարենը նշեց, թե փոխվարչապետներից մեկը պատվաստվել է AstraZeneca-ով, մյուսը՝ SputnikV-ով եւ հույս հայտնեց, թե ԱԺ նախագահությունից մեկն էլ կպատվաստվի չինականով, ինչին իմքայլականներն արձագանքեցին ծիծաղով։ Իսկ նախագահությունում նստած ԱԺ նախագահ Արարատ Միրզոյանն ու փոխնախագահ Ալեն Սիմոնյանը միմյանց մատնացույց արեցին՝ որպես պոտենցիալ պատվաստվողի։

Ինչպես արդեն հայտնել ենք՝ մայիսի 2-ին Երևան է ժամանել Չինաստանի կառավարության կողմից Հայաստանին օգնության կարգով տրամադրված կորոնավիրուսի դեմ 100.000 հատ պատվաստանյութի խմբաքանակը, որի որակը, փաստորեն, ամենաբարձր մակարդակով դրվեց կասկածի տակ՝ դարձնելով ծիծաղի առարկա, արդյոք սա չի ազդի Հայաստան- Չինաստան հարաբերություններ վրա։

Ներսիսյանը նկատեց, որ 2018 թվականից Փաշինյանը արտաքին քաղաքականությունը ձախողել է:

«Կորոնավիրուսի դեմ պայքարի ժամանակ, իշխանություններն (ՀՀ առողջապահության նախկին նախարար Արսեն Թորոսյան – հեղ.) իրենց թույլ տվեցին անհարգալից արտահայտվել Վրաստանի հանդեպ: Վրաստանի առողջապահության նախարարությունը պահանջել էր, որպեսզի հայկական կողմը ներողություն խնդրի:

Հիմա նրանք անհարգալից են իրենց պահում Չինաստանի նկատմամբ: Այս իշխանությունները վարում են հայատյաց քաղաքականություն, նրանք ուզում են Հայաստանը մտցնել շրջափակման մեջ, որպեսզի մնանք մենք և մեր թշնամի հարևանները: Կապ չունի, ինչի մասին է խոսում Փաշինյանը՝ պատվաստանյութի, կամ այլ բանի, նա անում է ամեն ինչ, որպեսզի մենք հայտնվենք շրջափակման մեջ», - ընդգծեց Ներսիսյանը:

Բժիշկը նաև կասկածներ հայտնեց, որ վարչապետի ժամանակավոր պաշտոնակատարն ընդհանրապես պատվաստվել է:

«AstraZeneca պատվաստանյութի ժամկետը լրանում է մասիսի 18-ին: Մենք այդ պատվաստանյութի մոտ 14.000 դեղաչափ ունենք, իսկ իմ տեղեկություններով, AstraZeneca-ով պատվաստվել են մոտ 600 մարդ: Հաշվի առնելով, որ ժամկետը լրանում է, պատվաստանյութը պետք է ծախսել, թե որտեղ այն կօգտագործվի ուրիշ հարց է:

Ես շատ խորը կասկածներ ունեմ, որ Փաշինյանը պատվաստվել է, համոզված եմ, որ դա եղել է վիտամինների կոմպլեքս, որպեսզի ցույց տա մեր քաղաքացիներին, թե պատվաստվում է: Մենք բոլորս հիշում ենք, թե ինչպես էինք 44 օր շարունակ Նիկոլ Փաշինյանի հետ «հաղթում», սակայն պարզվեց, որ այդ օրերի ընթացքում մենք տարածքներ ենք հանձնել: Եթե անգամ Փաշինյանը պատվաստվել է, դա եղել է Sputnik V-ն: Սակայն, նորից պետք է նշեմ, որ չեմ հավատում նրան, որ վարչապետի ժ.պ.-ն իսկապես պատվաստվել է», - շեշտեց Ներսիսյանը:

«Պարացելսուս» հասարակական կազմակերպության նախագահը նաեւ համոզմունք հայտնեց, որ երկրի ղեկավարությունը փորձելու է կամավոր-պարտադիր սկզբունքով ստիպել բոլոր քաղաքացիներին պատվաստվել:

«Արդեն ասվել է, որ այն քաղաքացիները, որոնք չեն ունենա պատվաստում չեն կարողանա ճանապարհորդել: Սակայն, հայ ժողովուրդը արդեն արթնացել է և չի ենթարկվելու կամավոր-պարտադիր սկզբունքին»,- եզրափակեց Ներսիսյանը:

Հեղինակ՝ Անի Մշեցյան

Աղբյուր` Փաստինֆո