Փաստ ինֆո

Շատ պաստառներ կան, մեկը կա՝ գիրք է գովազդում իր նկարով, բայց քաղաքակլան գործիչ է և մասնակցելու է ընտրություններին։ Այս մասին լրագրողների հետ զրույցում ասաց ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը՝ անդրադառնալով դիտարկմանը, որ քաղաքում պաստառներ կան, որոնք նախընտրական քարոզչություն է հիշեցնում, նման պաստառներ ունեն ՔՊ, «Լուսավոր Հայաստան» կուսակցությունները։

«Անցյալ ընտրությունների ժամանակ մեկը կար գրել էր՝ «Ձեր պատգամավորը»։ Նա գործող պատգամավոր էր և որևէ եղանակով դա չէր կարող դիտարկվել որպես քարոզչություն»,-նշեց Վարդանյանը՝ հավելելով, որ դրա համար պատրաստվել է Ընտրական օրենսգրքում փոփոխություններ կատարելու համապատասխան նախագիծ, որով փորձ է կատարվում կարգավորել քարոզչությունը, այդ թվում՝ նախըտրական։ Վարդանյանը նշեց, որ կարևոր է, որ խաղի պայմանները լինեն հավասար, իսկ եթե կան անհանգստություններ, որ տեղի է ունենում ինչ-որ գործընթաց, որը չի համապատասխանում օրենսդրությանը, ապա հորդորեց՝ դիմել ԿԸՀ և պատկան մարմիններին՝ դրան համարժեք արձագանք տալու համար։

Ինչ վերաբերում է Ընտրական օրենսգրքի փոփոխություններին և ընդունվելու դեպքում դրանց՝ ուժի մեջ մտնելուն, Վարդանյանը հայտնեց, որ քաղաքական ուժերի հետ ձեռք բերված պայմանավորվածությունները չեն կարող վերջին պահին փոխվել, խաղի կանոնները վերջին պահին չեն փոփոխվում, ԿԸՀ-ն պետք է հնարավորություն ունենա, ժամկետներ ունենա, որ կարողանա համապատասխան ենթաօրենսդրական ակտեր ընդունել, պետք է հասկանալ։

«Մենք ելնում ենք այն կանխավարկածից, որ կա հստակ կոնսեսուս և ըմբռնում առ այն, որ փոփոխությունները պետք է գործադրվեն ավելի ուշ»,- նշեց Վարդանյանը։

Աղբյուր` Փաստինֆո