Փաստ ինֆո

«Չնայած որոշ փորձագետների եւ քաղաքական գործիչների հավաստիացումներին, փաստացի, մենք գնում ենք ընտրությունների», - «Փաստինֆո» - ի եթերում հայտարարել է մեդիափորձագետ Տիգրան Քոչարյանը: «Նույնիսկ Հանրապետական կուսակցությունը, որը խուսափում էր ընտրություններին մասնակցելուց, որոշել է մտնել այդ գնացք։ Մի փոքր, ի դեպ, անսպասելի բոլորի համար: Դա խոսում է այն մասին, որ ՀՀԿ – ում էլ են հավատացել, որ ընտրությունները լինելու են և ուրիշ տարբերակ չկա»։

«Կողմերից որևէ մեկը ընտրությունները տապալելու վերջին շանսն ունի մայիսի 3-10-ն ընկած ժամանակահատվածում, երբ Փաշինյանը չպետք է ընտրվի վարչապետ, և ոչ ոք չպետք է ընտրվի վարչապետ,-շարունակում է զրուցակիցը: Եթե այս 8 օրերի ընթացքում ոչինչ տեղի չունենա, խորհրդարանն ինքնալուծարվելու է, և արագացված տեմպերով սկսվելու է ընտրությունների նախապատրաստումը։

Մենք արդեն տեսնում ենք շատ մանր կուսակցությունների և շարժումների ի հայտ գալը, որոնցից յուրաքանչյուրն ունի իր նպատակները։ Նրանց մի մասը հայհոյելու է Փաշինյանին, մյուս մասը՝ ընդդիմության թեկնածուներին։ Այսինքն՝ դրանք գաճաճ կուսակցություններ են, որոնք եթերային ժամանակ են վերցնելու և համապատասխան տեղեկատվական հոսքեր են ուղղելու բնակչությանը։ Ես լուրջ չեմ վերաբերվում այդ շարժումներից ոչ մեկին»։

«Իրականում արդեն հասկանալի են ընդդիմության անցողիկ դաշինքները եւ կուսակցությունները, - նշում է մեդիաէքսպերտը։ Հիմա պետք է հասկանալ, թե Փաշինյանի հետ ով է քայլելու ընդդիմադիր դաշտում։ Դաշտը, գլոբալ առումով, կարելի է բաժանել 4 մասի՝ Փաշինյան, Քոչարյան, նրանք, ովքեր չեն աջակցում Փաշինյանին, բայց ատում են Քոչարյանին, և նրանք, ովքեր ատում են Փաշինյանին, բայց խնդիրներ կամ հակասություններ ունեն Քոչարյանի հետ։ Այնտեղ ևս բավական մեծ թվով ձայներ են ցրվել։ Եվ ոչ մի նոր ուժ, վստահեցնում եմ ձեզ, չի լինելու»։

«Բարգավաճ Հայաստանի» եւ «Լուսավոր Հայաստանի» ընտրազանգվածը հավասարաչափ բաշխված է «Լուսնի երկու կողմերի» միջեւ։ Պայմանականորեն անվանենք դրանք, մութ ու լուսավոր, յուրաքանչյուրը, ինչպես ուզում է, թող ինքն ընտրի։ Ասել, որ Ծառուկյանի ընտրազանգվածը միանշանակ ընդդիմադիր ընտրազանգված է, ճիշտ չէ։ Այնտեղ շատ են նրանք, ովքեր այսպես ասենք, քաղաքականությունից այնքան էլ լավ չեն հասկանում։ Միեւնույն ժամանակ, նրանք աստվածացնում են այն մարդուն, ում հետևից գնում են՝ չնայած նրա բոլոր մեղքերին:

Նույն կատեգորիան ունի նաև «Լուսավոր Հայաստանը»։ Այսինքն, եթե, օրինակ, Էդմոն Մարուքյանը չգնա ընտրության, դժվար է ասել, թե ուր կգնան այդ կատեգորիայի ձայները։

Համարվում է, որ Ծառուկյանն ընդդիմադիր դաշտ է։ Բայց նա հայտնի է նրանով, որ կարողանում է շատ լավ խուսանավել և վաճառել իր ընտրողների ձայները։ Վաճառել, լավ իմաստով, այսինքն, դուրս մղել նախապատվություններ իր կուսակցության համար»:

«Կան նաեւ այլ խաղացողներ, այսպես ասած, ռուսատյաց մասը, որն, ըստ էության, կարող է հավաքել մինչեւ 3-4 տոկոս ձայն։ Սա Արման Բաբաջանյանն է, ով իրեն Վազգեն Սարգսյանի ու «Սասնա ծռերի» եղբայր է անվանում։ Տեսնենք, թե բնակչության որ մասն է մեզ մոտ տառապում ռուսատյացությամբ, ինձ թվում է՝ դրանք շատ քիչ են։

Այսպիսին է մեր քաղաքական դաշտը։ Մնացած բոլոր կուսակցությունները, ամենայն հարգանքով իրենց նկատմամբ, կամ կխանգարեն, կամ կօգնեն։ Նրանք ինքնուրույն խաղացողներ չեն», - համոզված է Տիգրան Քոչարյանը։

Հարցազրույցը վարեց Լանա Մշեցյանը

Աղբյուր` Փաստինֆո