Փաստ ինֆո

Մենք պետք է հասկանանք, արդյոք ռուս սահմանապահները ունեն գործառույթ Հայաստանի Հանրապետության սահմանները պաշտպանելու՝ կարծում եմ չունեն: Այս մասին «Փաստինֆո»-ի հետ զրույցում ասաց ռազմական փորձագետ Հայկ Նահապետյանը:

Ինչպես արդեն տեղեկացրել ենք՝ ԱԺ-ում այսօր Նիկոլ Փաշինյանը հայտարարել է, որ ՀՀ սահմանների պաշտպանությունը այժմ, ինչպես պատերազմից առաջ, իրականացվում է հայ-ռուսական համատեղ զորախմբի ուժերով: Որպես լրացուցիչ ապացույց նա նաեւ նշել, թե Սյունիքի մարզում 102-րդ ռուսական ռազմաբազայի երկու նոր հենակետ է տեղակայվել:

Նահապետյանը նշեց, որ ռուս սահմանապահները, սովորաբար տեղակայված են այն վայրերում, որտեղ հայկական բնակավայրերը միացնող ավտոճանապարհը անցում է այն վայրերով, որոնք համարվում են Ադրբեջանի տարածք, խոսքը գնում է Գորիս-Կապան ճանապարհի մասին:

«Սահմանապահ-ուղեկալի գործառույթը սահմանի պաշտպանությունը չի, այլ այդ ճանապարհով անցնող ավտոմեքենաների անխափան ընթացքը ապահովելն է: Հայաստանի Հանրապետության սահմանների պաշտպանությունը իրականացնում են Պաշտպանության նախարարության ստորաբաժանումները: Փաշինյանը հերթական անգամ իր իրազեկվածություն է ցույց տալիս:

Ըստ նրա՝ Փաշինյանը կամ իրազեկված չէ, թե ինչ է կատարվում Սյունիքում, կամ իրազեկված է, բայց փորձում է ցույց տալ, որ Սյունիքում խնդիրներ չկան: Ես խորհուրդ եմ տալիս Փաշինյանին և «Քաղաքացիական պայմանագիր» կուսակցության անդամներին, եթե Սյունիքում նրանք խնդիրներ չեն տեսնում, հանգստյան օրերին ապրեն Շուռնուխում կամ Որոտանում: Սակայն, ամենալավ ապացույցը, որ այնտեղ անվտանգ չէ այն է, որ Սյունիք գնալուց Փաշինյանը գնացել էր Տաթևի ճանապարհով»,- շեշտեց փորձագետը:

Նա նաև ասաց, որ նման հայտարարություններով հանրությանը տրվում են ոչ ճիշտ տեղեկություններ:

«Այսինքն, Փաշինյանը փորձում է մեզ ցույց տալ, որ չկան գյուղացիների հանդեպ բռնություններ, չկան առեւանգումներ, չկա անասնագողություն: Կառավարության մի քանի օղակներ այժմ չեն կարողանում կատարել իրենց պարտականությունները, մասնավորապես Պաշտպանության նախարարությունը, ԱԱԾ-ն, Ոստիկանություն, տեղական ինքնակառավարման մարմիններ և այլն: Փաշինյան Նիկոլի ժամանակ Հայաստանը աստիճանաբար վերածվում է սուբյեկտից օբյեկտի, քանի որ Փաշինյանի յուրաքանչյուր քայլ վտանգում է մեր պետականությունը, իսկ պետականության վտանգումը նշանակում է վտանգել պետական ինստիտուտների իրենց բուն գործառույթը իրականացնելուն: Եվ այդ ինստիտուտները աստիճանաբար իրենց գործառույթներից դուրս են մնում, և, ցավոք սրտի, մեր անվտանգության հետ կապված խնդիրները մեր դաշնակիցներն են իրականացնում: Մինչդեռ դա պետք է լիներ Փաշինյանի պարտականությունը», - ասաց Նահապետյանը:

Հեղինակ՝ Անի Մշեցյան

Աղբյուր` Փաստինֆո