Փաստ ինֆո

Հայաստանում կային շատ կայացած ինստիտուտներ։ Եթե մի 5 լավ բան կար և 100 վատ երևույթ, այդ 5 լավ բանն այս ընթացքում քանդվեց, իսկ 100 վատ երևույթնն ավելացավ։ ԱԺ-ում լրագրողների հետ ճեպազրույցի ժամանակ այս մասին ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով Նիկոլ Փաշինյանի այն հայտարարությանը, որ Հայաստանում միակ կայացած ինստիտուտը կոռուպցիան էր, որը քանդեցին։

«Ձևակերպումներն են փոխվել։ Եթե այն ժամանակ կային իշխանության օլիգարխներ, հիմա կոչվում են սեփականատերեր։ Եթե այն ժամանակ կային ֆեյքերի ֆաբրիկաներ, դրանք անցան իշխանությանը։ Հեղափոխությունից հետո այս իշխանությունը չի փոխել համակարգը։ Հիվանդ քաղաքական համակարգը մնացել է։ Կային լավ բաներ, Գյուղատնտեսության, Մշակույթի նախարարությունները, որոնք լուծարեցին»,-նշեց Էդմոն Մարուքյանը՝ հավելելով, որ կոռուպցիան բավականին նվազել է կենցաղային մակարդակում։

Էդմոն Մարուքյանը նկատեց՝ իշխանություններն ամեն ինչ արել են, որ մարդիկ հիասթափվեն ամեն ինչից, չհավատան պետական ինստիտուտներին և ապագայի հետ կապված խնդիր տեսնեն. «Երեք տարվա իր կառավարման արդյունքում այս իշխանությունը կարգախոս է դրել շրջանառության մեջ, որ ապագա կա։ Հայաստանում երբեք այդ հարցը չի առաջացել՝ ապագա կա, թե չկա։ Այսինքն երեք տարի այնպես են կառավարել երկիրը, որ հարց է առաջացել ու պետք է մարդուն համոզեն, որ ապագա կա։ Այս իշխանությունն իր՝ «Ապագա կա» կարգախոսով ամփոփում է իր գործունեությունը, թե ոնց է աշխատել, որ ապագան դարձել է հարցական»,-հավելեց պատգամավորը։

Աղբյուր` Փաստինֆո