Փաստ ինֆո

Եթե «Հանրապետականը» և «Հայրենիքը» որոշել են միասին գնալ ընտրությունների, դա իրենց գործն է, ավելի կարևոր է՝ թե ինչ օրակարգ, ծրագիր են ներկայացնելու: Այս մասին «Փաստինֆո»-ի հետ զրույցում ասաց քաղաքագետ Թևան Պողոսյանը:

Հիշեցնենք, որ երեկ ՀՀԿ-ն հայտարարեց, որ որոշում են կայացրել մասնակցել առաջիկա արտահերթ ընտրություններին ՝ Արթուր Վանեցյանի գլխավորած «Հայրենիք» կուսակցության հետ:

Հարցին՝ հաշվի առնելով, որ Հանրապետականը երկար ուղի անցած կուսակցություն է, իսկ Հայրենիքը՝ նոր ձևավորված, արդյո՞ք սպասելի էր այս երկու կուսակցությունների համագործակցությունը, քաղաքագետն ընդգծեց, որ քաղաքականության մեջ ոչինչ բացառել չի կարելի.

«Կապ չունի՝ հին են, թե՝ նոր: Տարիքային իմաստով բոլորն էլ ինչ-որ ժամանակ համագործակցել են: Եթե կունենան ունակություն ապագային միտված համատեղ ծրագիր ներկայացնելու, ուզում է ամենահինը լինի, ուզում է ամենաերիտասարդը, դա կապ չունի: Այդ երկու կուսակցությունները 6 ամիս ՀՓՇ-ում էլ էին միասին: Ցանկացած միացմանը պետք է ողջունել, բայց կարևոր է ներկայացնեն օրակարգ՝ թե ինչ են անելու»,-ասաց փորձագետը:

Ինչո՞ւ հենց ՀՀԿ-Հայրենիք դաշինք, Թևան Պողոսյանն ասաց՝ հավանաբար կոնսուլտացիաներ են տարել, որոշել են, որ համատեղ մոտեցումներ ունեն.

«Հայրենիքի համար միգուցե լավ է, որ ՀՀԿ-ն ուղի անցած կուսակցություն է, ինչ-որ բաներ կսովորեն, Հանրապետականի համար էլ լավ է, որ Հայրենիքը նոր կուսակցություն է, թարմ մտքեր կլինեն: Ի վերջո, այս ամենի վերջը լինելու է նախընտրական ծրագիրը»:
Դիտարկմանը՝ եթե բոլոր կուսակցությունները հայտարարում են, թե ընտրությունների մասնակցելու նպատակը ոչ թե իշխանության գալն է, այլ՝ գործող իշխանության հեռացումը, ապա այս պայքարում ընտրություններին դաշինքով հանդես գալը որքա՞նով արդյունավետ կլինի՝ զրուցակցի դիտարկմամբ՝ դա կախված է քաղաքական ուժերի ունակությունից, որ կարողանան հանրությանը համոզել, որպեսզի ընտրություններին հենց իրենց քվե տան.

«Եթե կարողանան հանրությանը ոգևորել և կարողանան այնպես անել, որ շատ ձայն հավաքեն, թույլ չտան, որ գործող իշխանությունը վերընտրվի, դա կնշանակի, որ նրանք ճիշտ են եղել»,-ասաց քաղաքագետը:
Անդրադառնալով տեսակետներին՝ թե որքան ընդդիմադիր դաշտը միասնական հանդես գա, այնքան գործող իշխանության հեռացման պայքարը կհաջողի քաղաքագետն ասաց.

«Կա դրա մեջ ճշմարտություն, բայց կա նաև երկրորդ հանգամանքը՝ իսկ եթե չանցնեն շեմերը և փոշիացնեն այդ ձայները: Հիմա մի իրավիճակում ենք, որ ԸՕ ցանկացած փոփոխություն, ամբողջ քաղաքական դաշտի համաձայնությամբ չի եղել, այլ՝ մեկ քաղաքական ուժի քմահաճույքի: Միայն իմքայլականները քննարկել են, քվեարկել են: Հիմա դաշինքների համար անցողիկ շեմը դարձրել են 8 տոկոս, եթե դաշինքներն այդ 8 տոկոսը հավաքեն, շատ լավ, իսկ եթե չհավաքեն, փոշիանալու է այդ ձայները և գումարվելու է անցնողների ձայնին, այդ ձայները կորելու են»,-ասաց Թևան Պողոսյանը:

Դիտարկմանը, որ երկրորդ և երրորդ նախագահները, չնայած համատեղ օրակարգին, ընտրություններին միասնական հանդես գալու կամք չցուցաբերեցին, քաղաքագետն արձագանքեց.

«Պատկերացրեք, որ բոլոր նախագահները միավորվեին մեկ կուսակցության շուրջ, որքան գրավիչ կլիներ: Դա կլիներ միասնություն: Իսկ Նիկոլ Փաշինյանը պետք է ճանապարհ հարթեր միասնության համար, այդ ճանապարհը սկսվում է իր հեռանալով, որովհետև, որպես ղեկավար, ինքը չկարողացավ երկիր կառավարել, թույլ չտալ, որ երկիրն այս արհավիրքի մեջ հայտնվի: Այսօր Նիկոլ Փաշինյանը որպես առաջին քայլ ազգային միասնություն ձևավորելու համար, պետք է իր քաղաքական պատասխանատվությունը կրեր ու պարզապես հեռանար՝ հանուն հայրենիքի։ Այդ ժամանակ կլիներ դաշտ՝ մնացած ուժերի համար, որպեսզի միավորվեն, մեկ անձի համար չեն միավորվում: Դա կլիներ հզոր մեսիջ»,-ասաց Թևան Պողոսյանը:

Հարցին՝ բացառու՞մ է ամեն դեպքում ընտրություններին երեք նախագահների համատեղ հանդես գալը, քաղաքագետը չբացառեց.
«Միգուցե վերջում երեքն էլ միասին գնան ընտրությունների, մենք նման դեպքեր տեսել ենք, երբ նրանք հանդիպել են, իսկ մեզ թվում էր, նրանք իրար բարև չեն տա, բայց պարզվեց, որ կա ճգնաժամ և այդ մարդիկ քաղաքական առումով հասուն են, հանդիպում են, նույնիսկ պատրաստվում էին համատեղ այցեր ունենալ: Դա կախված է լինելու իրենց մոտեցումներից դեպի հայրենիք»,-ասաց Թևան Պողոսյանը:

Քաղաքագետը կարևորեց, որ քաղաքական դաշտը միավորվի հանուն մեկ նպատակի՝ թույլ չտալու, որ գործող իշխանությունները վերարտադրվեն, քանի որ ամեն բան տապալել են:

Աղբյուր` Փաստինֆո