Փաստ ինֆո

Սյունիքի մարզի Ներքին Հանդ գյուղում բնակիչները շարունակում են ապրել իրենց հոգսերով՝ վախը սրտում։ Գյուղի վերջին տունը սահմանից ընդամենը 250 մետր է հեռու։
«Փաստինֆո»-ի հետ զրույցի ժամանակ Ներքին Հանդի գյուղապետ Խաչատուր Բաղդասարյանն ասաց, որ գյուղը լքողներ այս ընթացքում չեն եղել, խուճապ էլ չկա, քանի որ միջադեպեր չեն գրանցվել, բայց այն, որ վտանգավոր է, դա պարզ է։

«Մի քանի անգամ անկանոն կրակոցներ եղել են, բայց արդեն մի քանի ամիս է նման բան չկա։ Չնայած գյուղի դպրոցը 500 մ է հեռու սահմանից, բայց աշակերտները շարունակում են դպրոց հաճախել։ Ընդհանուր 12 աշակերտ ունենք գյուղում»,-նշեց համայնքապետը։

Նրա խոսքով նախկինում անասուններին արածացնելու համար օգտվում էին Արցախի Հանրապետության տարածքից, սակայն քանի որ այդ տարածքները մնացել են հակառակորդի վերահսկողության ներքո, բնակիչներն իրենց արոտավայրերն են օգտագործում միայն. «Ճիշտ է դա խնդիր է, ամեն օր հսկողության տակ պետք է պահենք։ Այս ընթացքում անասունների քանակը չի պակասել, կարող է 1-2-ին մորթած լինեն կարիքների համար։ Մոտ 20 օր առաջ երեք անասուն սահմանն անցան, ադրբեջանցիները քշեցին տարան։ Մեր զինված ուժերն ու խաղաղապահները միջամտեցին և հետ բերեցին։ Դեռ նման դեպք չի եղել, որ տանեն անասուններին ու հետ չվերադարձնեն»,-նշեց Խաչատուր Բաղդասարյանը՝ ավելացնելով, որ անասուններին արածացնելու համար սահմանին մոտ չեն տանում, գյուղից վերև են տանում։

Գյուղապետի խոսքով սահմանի վրա 40 հա տարածք ունեն, որից 13-14 հեկտարն աշնանացան է արվել և ամռանը հնձի ժամանակ պարզ կլինի՝ ինչպես կկարողանան բնակիչներն այդ աշխատանքներն իրականացնեն. «Սահմանի վրա այգի ունենք, մարդիկ գնում են այնտեղ իրենց աշխատանքներն են անում։ Փառք Աստծո ոչ մի միջադեպ չի եղել։ Միշտ էլ սպասում ենք, որ կարող է վտանգ լինի»,-հավելեց Խաչատուր Բաղդասարյանը։

Աղբյուր` Փաստինֆո