Փաստ ինֆո

Արավուսցի հովիվ Ֆելքիս Ավագյանը ադրբեջանցիների հարձակումից մեկ շաբաթ անց էլ աչքի հատվածում ցավեր ունի ու դիմել է բժշկական օգնության։ Ֆելիքս Ավագյանը «Փաստինֆո»-ին տեղեկացրեց, որ այսօր Գորիսում էր՝ հետազոտության։

«Եկանք հիվանդանոց, աչքս նայել են, ոչ քունս ա տանում, ոչ մի բան, հիմա էլ հետ եմ գնում տուն։ Եկալ ենք հիվանդանոց՝ նայել, ասում ա դեղ պետք է քսեն։ Աչքս սևացած է, լրիվ կարմրած»։

Սյունիքի մարզի Արավուս գյուղը Նիկոլ Փաշինյանի ստորագրած կապիտուլյացիոն ակտից հետո սահմանամերձ է դարձել. ադրբեջանական հենակետերը գտնվում են արոտավայրերը մի քանի մետր հեռավորության վրա։ Ինչպես արդեն տեղեկացրել ենք՝ հովիվ Ֆելիքս Ավագյանին ադրբեջանցի զինվորները քաշքշել, խփել աչքին, հայհոյել, սպառնալով պահանջել, որ անասուններով հանդերձ հեռանալ, հովիվն էլ հակադարձել է, թե դա հայկական հող է, ինչին ի պատասխան ասել են, թե հովվին ուղղիղ Բաքու կտանեն։ Ավագյանը դիմադրել է այնքան, մինչև իրեն օգնության են հասել։

«Ութ հոգի էին։ Ավտոմատներով էին, չէի ենթարկվում, որ ինձ տանեն խրամատի մեջ։ Ասում էին հողը մերն ա, պրծավ։ Եթե ես չպաշտպանվեի, ինձ տանելու էին ուղիղ խրամատ։ Իրանց կամանդիրը ադրբեջաներեն ասում է արի այստեղ, ես ասում եմ չեմ գալիս, չեմ ենթարկվում։ Մեր տղերքն էլ, ջիգյարները ուտեմ, իմ կյանքը փրկեցին։ Նոր իրենց կամանդիրը եկել ա ասում է քինացեք, հետո ես դուրս եմ եկել։ Ասում ա քեզ Բաքու կտանեն։ Թղթերս են ստուգել, ստորագրություն վերցրել։ Իրանց կամանդիրը հասկացրեց՝ կարաք անասունը պահեք, բայց սահմանին մոտ չգաք»։

Ավագյանը 40 գլուխ կենդանի է պահում արոտավայրերից զրկված Արավուսում, հասցնում է անգամ կատակել՝ «լյոխի պյանը պահում եմ, մինակ կնիկ չունեմ»։ Արավուսցիները ստիպված են վաճառել կենդանիներին, որովհետև վախենում են արոտավայր գնալ։

«Մեր գյուղին վիճակ չկա, վախում ենք անասունին տանենք արոտ։ Ժողովուրդը անասուններին բոլորը ծախում են։ Վախում են ժողովուրդը դուրս գան դաշտ։ Ես չեմ վաճառելու, իմ անասունը հիմա էնտեղ արածում է։ Ինձ ասում են, իբր, ես խախտում եմ արել, իբր, իրանց հողն ա։ Եթե իրանցն է, թող ճշտեն, որ չգնամ իրանց թակարդը ընկնեմ էդ օղռաշների»։

Ադրբեջանական վայրագություններից տուժած Ավագյանը աչքի բուժման ծախսերը ինքն է հոգացել։ Նշեց նաև, որ 27- ամյա որդին, ով հիմա դիրքերում է, վարկեր ունի ու չնայած պատերազմի մասնակից է, ներումների չեն գնացել, ամեն օր զանգահարում ու վարկի մարման գումարն են պահանջում։

«Տղաս 8 տարի է լակատրները ինքն է աշխատացնում, որ պատերազմի ժամանակ թխում էին։ Վարկ ունի, ինքն էլ հիմա պոստերում է, էդ վարկի համար ամեն օր զանգում են, ասում եկեք վճարեք։ Մեկ միլիոնի չափ վարկ ունի, որը վերցրել էր գործի համար, հիմա չի կարողանում փակի, ինչ պատերազմը սկսվել է, ամեն օր զանգահարում են»։

Արավուսցի հովիվը նաև դեմ չէ, որ գյուղում աշխարհազոր ստեղծվի՝ գյուղացիներն օրինական գրանցվեն, զենք ստանան ու սահմանը հսկեն, ասում է՝ «պիտի էդ գյուղը պահեն, գյուղում վիճակ չկա»։ Ադրբեջանական կողմն էլ դեպքից հետո շարունակում է վայրագությունները.

«Իրենք մենակ նագլի ուշունց են տալիս, բայց լյոխ օքեյա»,- ասաց Ավագյանն ու տեղեկացրեց, որ դեպքից հետո իրեն ոստիկանություն չեն հրավիրել, ասել է, թե ՀՀ իրավապահները ՀՀ քաղաքացու նկատմամբ ադրբեջանցիների վայրագությանը իրավական գնահատական չեն տվել։

Աղբյուր` Փաստինֆո