Փաստ ինֆո

Դուք բոլորդ հրապարակային տեսաք, թե ՀՀ գլխավոր դատախազության շենքի մոտ ինչ էր տեղի ունենում։ Ի՞նչ են պահանջում ակցիայի մասնակիցները, ասում են՝ իջեք ու մեզ ժամկետներ ասեք, թե ում նկատմամբ հետապնդումը, երբ կդադարեցվի։ Ոչ, դատախազը չի իջնի և նման բան չի ասի։ Կարծու՞մ եք՝ ամեն իրավաչափ չհամարողին ես պետք է իջնեմ ու պարզաբանեմ։ ԱԺ-ում լրագրողների հետ զրույցում նման հայտարարությամբ է հանդես եկել ՀՀ գլխավոր դատախազ Արթուր Դավթյանը։

Դիտարկմանը, որ Ռոբերտ Քոչարյանի խափանման միջոցի փոփոխման ժամանակ ինքն իջել է և ակցիայի մասնակիցներին պարզաբանումներ տվել, Դավթյանը նշեց, որ այնտեղ ակցիայի մասնակիցների պահանջն այլ էր, դատախազությունը պաշտոնապես հրապարակում էր արել, որ բողոք է տարվել դատական ակտի դեմ, ակցիայի մասնակիցները եկել էին և ցանկանում էին հավաստիանալ, որ բողոք տարվել է։

Ինչ վերաբերում է Սյունիքում ակցիաներից հետո խորհրդակցության ժամանակ Նիկոլ Փաշինյանի կողմից ոստիկանապետին, ԱԱԾ տնօրենին տրված հրահանգներին, որ պետք է անհապաղ միջոցներ ձեռնարկվեն, Դավթյանը նշեց, որ իրեն նման հրահանգ չի իջեցվել, իսկ նշված պաշտոնատար անձինք համարվում են վարչապետին առընթեր պետական մարմինների ղեկավարներ և կառավարության ղեկավարը կարող է իր ենթակաների հետ կիսվել։

«Նույնիսկ, եթե դրա անունը դնեք հրահանգ, միևնույն է, քրեական վարույթում ամեն ինչ իրականացվում է այնպես, ինչպես նախատեսել է Քրեական օրենսգիրքը, Քրեական դատավարության օրենսգիրքը՝ անկախ նրանից, թե ով ում ինչ հրահանգ է տվել»,- նշեց Դավթյանը։

Հիշեցնենք, որ Կապանում տեղի ունեցած խորհրդակցության ժամանակ Նիկոլ Փաշինյանը ոտքի էր կանգնեցրել մարզի դատախազին եւ քննչական վարչության պետին՝ տեղեկատվություն պահանջելով ակցիաների առնչությամբ կատարված գործողությունների վերաբերյալ։

Մինչդեռ՝ ՀՀ սահմանադրությամբ դատախազությունն ու քննչական կոմիտեն անկախ մարմիններ են, գործադիրին առընթեր չեն եւ նրան գործունեությանը միջամտելը համարվում է հանցագործություն։

Աղբյուր` Փաստինֆո