Փաստ ինֆո

ՀՀ երրորդ նախագահ Սերժ Սարգսյանը կինոռեժիսոր Մհեր Մկրտչյանի հետ զրույցում անդրադարձել է 2018թ. ապրիլյան իրադարձություններին, խոսել այն մասին, թե ինչու հրաժարվեց իշխանությունից:

-Որպեսզի հրաժարական տաս պաշտոնից, հատկապես այդպիսի պաշտոնից, դու դրանից ավելի կարևոր բան պետք է ունենաս: Ես ունեի,-ասել է ՀՀ երրորդ նախագահ Սերժ Սարգսյանը։

Ըստ նրա, պաշտոնը երբեք ինքնանպատակ չի լինում, իշխանության գալը երբեք չի կարող լինել առանց գլխավոր նպատակի:

«Ես ունեի իմ գլխավոր նպատակը: Ինձ համար ամենակարևորը բազմաթիվ զրկանքների գնով անկախացած Հայաստանն և Արցախն էին: Եվ այդ կայացման ակունքներում կանգնածներից մեկն էլ, շատ շատերի հետ՝ ես էի: Ես պատրաստ չէի փորձությունների ենթարկել Արցախի անվտանգությունը, ես պատրաստ չէի զոհել մարդկանց հանուն նրա, որ մնամ իշխանության:

Ինչպես ցույց տվեցին հետագա գործողությունները, այս վարչապետի համար, այս իշխանությունների համար մարդկային կյանքը արժեք չունի: Եթե արժեք ունենար, ապա պատերազմն այսպիսի արդյունքներով չէր լինի»,- նկատեց Սարգսյանը:

ՀՀ երրորդ նախագահը կարծում է, որ այս իշխանությունները կամավոր հրաժարական չեն տալու:

«Անցած երեք տարիների ընթացքում, իրենք միայն քանդելով են զբաղված եղել: Քանդել են, մարդկանց տարել են, համենայն դեպս տարել են պատերազմ՝  համոզված լինելով, որ ունենալու ենք անհամաչափ քանակի զոհեր: Իսկ ինչո՞ւ իշխանությունը պահելու համար նրանք ուժ չեն կիրառի, անհամաչափ ուժ: Մենք տեսանք այդ անհամաչափ ուժի կիրառումը տարբեր տեղերում և հիմա էլ տեսնում ենք այս օրերին, թե ինչպես են իրենց պահում ոստիկաններն այն մարդկանց հանդեպ, որոնք  համարձակվել են անվայելուչ խոսք ասել վարչապետի հասցեին: Ստացվում է, վարչապետը կարող է բոլորի հասցեին ինչ ասես ասել, իսկ  ուրիշները չեն կարո՞ղ: Ինչո՞ւ նա կարող է ժողովրդի մի ստվար հատվածի անվանել գայլ, իսկ ինքն իրեն՝ գելխեղդ, իսկ մի սովորական քաղաքացի վարչապետին չի կարող անվանել, կա՛մ հիմար, կա՛մ մեկ այլ անուն տալ»,- ասաց Սարգսյանն ավելացնելով, որ եթե իրենց գայլ են ասում , ապա դրանից կարելի է անգամ չվիրավորվել։

«Եթե մենք գայլ ենք, իրենք ոչ թե գելխեղդ են, այլ՝ շնագայլեր: Կարծեմ ռուսերեն «шакал» են ասում շնագայլերին»,- նշել է ՀՀ երրորդ նախագահը։

Նրա արձանագրմամբ` իշխանությունն առաջին հերթին մեծ պատասխանատվություն է, և յուրաքանչյուր  քայլի համար պետք է պատասխանատու լինես՝  և՛ լավ քայլերի, և՛ վատ քայլերի համար:

«Այսինքն, իրեն չե՞ն հարցնելու, թե այդ ինչպե՞ս եղավ, որ մենք կորցրեցինք մեր երկրորդ հանրապետության տարածքի 75 տոկոսը, ինչպե՞ս եղավ, որ մենք ունեցանք այդքան զոհեր, ի՞նչ է նշանակում, որ դու հնարավորություն ունեիր, այսպես ասած, Ջաբրայիլից հետո պատերազմը կանգնեցնելու, բայց եթե կանգնեցներ, իրեն դավաճան կանվանեին: Ինչ ուզում են անվանեն»,- հայտարարել է Սարգսյանը, հավելելով, որ ներկա իշխանությունները  կործանում են բոլոր կառույցները և, ընդհանրապես, պետությունն ամբողջությամբ:

Սերժ Սարգսյանի խոսքով,  երբ գերագույն գլխավոր հրամանատարը, ասում է, որ ինքը պատասխանատու է, բայց մեղավոր չէ, դա անպատասխանատու մոտեցման դասագրքային օրինակ կարող է դառնալ:

«Մենք ապրիլյան պատերազմի ժամանակ կորցրեցինք  հերոսաբար կռված  75 տղաների, մենք կորցրեցինք 400 հեկտար տարածք, թեև ես ասում էի 800 hեկտար տարածք, հասկանալի պատճառներով ես դա մի անգամ բացատրել եմ, մենք մեղավոր էինք, պատասխանատու էինք, իսկ 5000 հոգի կորցրածը և 8000 քառակուսի կիլոմետր կորցրածը, որ 800 000 հեկտար է, մեղավոր չէ՞», - եզրափակել է Սարգսյանը:

Աղբյուր` Փաստինֆո