Փաստ ինֆո

Ադրբեջանի նախագահն է այդ զինվորների գլխավոր գերագույն հրամանատարը և դրանով ամեն ինչ ասված է։ Նա Հայաստանի և Արցախի բնակչությանը սպառնում է ցեղասպանությամբ։ ԱԺ-ում այս մասին ասաց ՄԻՊ Արման Թաթոյանը։

Վերջինս նկատեց, որ Հայաստանի և Ադրբեջանի միջև երբևէ չի եղել դելիմիտացիա կամ դեմարկացիա։ Դա չի եղել նաև Խորհրդային ժամանակաշրջանում. «Նրանց հայկական գյուղերում հայտնվելու պատճառով ամբողջությամբ խախտված են միջազգային կանոնները, որովհետև դեմարկացիայի և դելիմիտացիայի համար անհրաժեշտ են հանձնաժողովային աշխատանքներ։ Նախապես մանրամասն պետք է գույքագրվեին մեր գյուղացիների կարիքները, նրանց հնարավոր խնդիրները, հատուցումների ինչ հարցեր կարող են առաջ գալ, որովհետև միջազգային ուղեցույցների համաձայն՝ սահմանների հետ կապված գործընթացի բանալի հարցերից է՝ արդյոք մենք ունենք սահմանային բնակչության բնականոն կյանքի խաթարում, թե ոչ, իսկ մեր բնակիչների խաղաղ կյանքն ամբողջությամբ խաթարված է ադրբեջանական զինվորականների ներկայության պատճառով։ Ո՞ր միջազգային կազմակերպությունը կարող է ասել, որ դրական է այն, որ մեր երեխաների անմիջական հարևանությամբ ադրբեջանական զինվորականներ են։ Ինձ որևէ մեկը կարո՞ղ է բացատրել դա երեխայի լավագույն շահերից բխում է՞։ Իհարկե, ո՛չ»,-նշեց Արման Թաթոյանը։

Մարդու իրավունքների պաշտպանը չի ընդունում, որ ադրբեջանական զինված ուժերն իրենց սահմանին են կանգնած։ Նրանք բերում են 80-ականների քարտեզների հիման վրա նայում են ու ասում՝ սա մերն է, դա ձերը. «Չհասկացանք դե մենք էլ 20-ականների քարտեզը եկեք բերենք։ Մինչև 30-ականներ մեր սահմանները շատ մեծ են եղել։ Անգամ 1920-ականներին ադրբեջանցիները մոտավորապես նույն քաղաքականությունն էին վարում։

Նախ անընդհատ հարձակում էին գործում մեր գյուղացիների վրա։ Անվտանգության գոտին ենթադրում է, որ ադրբեջանական զինված ուժերը պետք է ներկայիս իրենց գտնվելու վայրից, հատկապես ճանապարհներից հեռանան։ Կարո՞ղ եք ասել՝ ինչ է լինելու մեր քաղաքացու իրավունքների հարցը, եթե այսպես կոչված ադրբեջանական վերահսկողության ներքո գտնվող ճանապարհահատվածում վթար տեղի ունենա։ Օրինակ Գորիսից գնում ենք Որոտան, մի հատ վթար տեղի ունենա, ի՞նչ է լինելու մեր քաղաքացու իրավունքների հետ կապված»,-ասաց Արման Թաթոյանը։

Աղբյուր` Փաստինֆո