Փաստ ինֆո

Հանրապետական-Հայրենիք կուսակցությունների դաշինքը բավականին հեռանկարային, մրցունակ դաշինք է: Իմ կարծիքով՝ այն բավականին ազդեցիկ ներկայություն է ունենալու խորհրդարանում, ապագա իշխանության ձևավորման գործում ունենալու է իր ծանրակշիռ մասնակցությունը: Այս մասին «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը:

Հիշեցնենք՝ թեեւ ՀՀԿ-ն դեմ էր արտահայտվում արտահերթ խորհրդարանական ընտրությունների անցկացմանը, բայց ապրիլի 29-ին հայտարարեց, որ, եթե այդուհանդերձ, ընտրություններ անցկացվեն՝ կմասնակցեն դրանց՝ «Հայրենիք» կուսակցության հետ քաղաքական դաշինք կազմելով։ Քաղտեխնոլոգի դիտարկմամբ՝ ակնհայտ է, որ թե՛ հիմնական ընդդիմադիր ուժերը, թե՛ բուտաֆորային ընդդիմադիր ուժերը տարբեր շարասյուներով են գնալու ընտրությունների: Յուրաքանչյուր ուժ, իր ռեսուրսին, քարոզարշավի արդյունավետությանը համապատասխան, իր ձայները կունենա:

Հարցին՝ նոր քաղաքական բևեռի ձևավորումն ինչպե՞ս կազդի ընդդիմադիր դաշտի զարգացումների վրա, քաղտեխնոլոգը կարծում է, որ «Տակտիկական առումով ընդդիմադիր հիմնական ուժերը գնում են առանձին շարասյուներով, սա նշանակում է, որ թեպետ ստրատեգիական առումով բոլոր ընդդիմադիրների գլխավոր նպատակը մեկն է՝ Նիկոլ Փաշինյանին և իր թիմին զրկել իշխանությունից, բայց պարզ է, որ տակտիկական առումով յուրաքանչյուր ընդդիմադիր շարասյուն փորձելու է հնարավորինս հարուստ ներկայություն ապահովել խորհրդարանում, որպեսզի հետագայում գործընկեր ընդդիմադիրների կետ կոալիցիա կազմեն՝ Նիկոլ Փաշինյանին և իր թիմին զրկելով իշխանությունից: Այս առումով ՀՀԿ- Հայրենիք դաշինքը բավականին մրցունակ դաշինք է, և կարող է լուրջ ներկայություն ունենալ խորհրդարանում, օգտակար լինել ընդհանուր ընդդիմադիր դաշտին՝ գործող իշխանությանը հեռացնելու հարցում»,-ասաց Վիգեն Հակոբյանը:

Քաղտեխնոլոգը հավանական համարեց, որ հիմնական ընդդիմադիր ուժերը ընտրություններին մասնակցեն առանձին, սակայն խորհրդարան անցնելուն պես, ձևավորեն կոալիցիա.

«Խորհրդարանական ընտրությունների դեպքում հնարավորություն կա մտնել խորհրդարան, այնտեղ ձևավորել նոր իշխանություն՝ կոալիցիաների միջոցով: Այս ընտրությունների դեպքում սա առավել քան ակտուալ է, քանի որ այսօրվա իրավիճակը ցույց է տալիս, որ որևէ քաղաքական ուժ առայժմ միայնակ ի վիճակի չէ ունենալ 50+1 ձայն և ձևավորել իշխանություն: Իմ տպավորությամբ՝ հաջորդ իշխանությունը լինելու է կոալիցիոն»,-ասաց Հակոբյանը:

Դիտարկմանը՝ ընդդիմադիրների պայքարն առավել արդյունավետ չէ՞ր լինի, եթե ընտրությունների գնային միասնական դաշինքով, քաղտեխնոլոգն արձագանքեց.

«Մեր անկախ պետության 30 տարվա ընթացքում այդ հարցը միշտ դրվել է ընդդիմադիր դաշտում, բայց երբեք չի հաջողել, որ ողջ ընդդիմադիր դաշտը միասնական մի կողմում լինի, դա երբեք չի ստացվել, միշտ եղել է տարբեր շարասյուներով ընտրություններին մասնակցելու տարբերակը և արդեն խորհրդարանում պայմանավորվել՝ ի՞նչ են անելու խորհրդարանում, խաղի կանոններ են սահմանում ընդդիմադիրները, օրինակ ՝ իրար չքննադատել, չխանգարել՝թիրախավորել մեկ ընդհանուր հակառակորդի:

Տվյալ դեպքում, հաշվի առնելով այսօրվա իշխանության որակը և արտաքին կառավարելիությունը, պայքարը Հայաստանում նմանվում է ազգային-ազատագրական պայքարի մի իշխանության դեմ, որը օտարի դրված իշխանություն է և օտարի կամքն է կատարում»,-ասաց Վիգեն Հակոբյանը և ավելացրեց.«Այս ընտրություններին ընդդիմադիրների մասնակցության ստրատեգիական նպաստը այն է, որ ընտրությունների փուլում հնարավորինս շատ ձայն վերցնեն և օրվա իշխանությանը զրկեն իշխանությունից»:

Աղբյուր` Փաստինֆո