Փաստ ինֆո

Ես փնտրում եմ այդպիսի մեղադրողի, որ մի օր դեմս կկանգնի։ Այս մասին լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ անդրադառնալով ՀՀ երկրորդ նախագահ Ռոբերտ Քոչարյանի և մյուսների գործը տապալելու վերաբերյալ դիտարկմանը։ 

«Բացահայտվածության հատվածով գործն ուղարկվել է դատարան, մնացած մասով ունենք անջատված մաս, որը մինչդատական վարույթում է։ Բացահայտված քրեական գործը մինչդատական վարույթում չի գտնվում»,- նշեց նա՝ հավելելով, որ իրավական տերմինոլոգիա չկա՝ գործը փշրվել, կա ՍԴ որոշում, կա դրա արդյունքում կայացված դատական ակտ, որը վիճարկվել է Վերաքննիչ դատարանում՝ համապատասխան հիմնավորումներով և գործի հեռանկարի հարցով դիմում է ներկայացվել ՍԴ։

Նրա խոսքով՝ եթե հաջողվում է հասնել ՍԴ-ում դիմումի բավարարմանը, ապա հնարավորություն է լինում գործով ամբաստանյալների մեղադրանքները վերաորակելու, իսկ եթե չի բավարարվում դիմումը, ապա նշված իրավական ճանապարհով չեն կարող գնալ։
Ինչ վերաբերում է հրաժարական տալուն, Դավթյանը նշեց, որ հրաժարական տալն ինքնանպատակ չէ։ Ավելին, դա համարում է պատասխանատվությունից խուսափել և կարծում, որ հրաժարական պետք է տալ այն ժամանակ, երբ պաշտոնական պարտականությունները կատարելու համար կան խոչընդոտներ։

Նկատենք, որ ՀՀ երկրորդ նախագահին եւ եւս երեք բարձրաստիճան պաշտոնատար անձանց մեղադրանք էր առաջադրվել 2008 թվականի մարտի 1-ի իրադարձությունների համար՝ ՀՀ քրեական օրենսգրքի 300.1-րդ հոդվածով, որը քրեական օրենսգրքում ներմուծվել է ավելի ուշ

Մինչդեռ՝ վատթարացնող նորմերը հետադարձ ուժ չունեն, հետեւապես դատախազությունն ի սկզբանե տեղյակ էր, որ տվյալ հոդվածով առաջադրված մեղադրանքը չի կարող ունենալ դատական ավարտ։ Ինչ վերաբերում է մահվան դեպքերին, ապա դրանք այդպես էլ մնացել են չբացահայտված, թեեւ 2018 թվականի ամռանը՝ Նիկոլ Փաշինյանը հայտարարել էր, որ բացահայտվել են։ Համենայն դեպս՝ սպանության դրվագով որեւէ քրեական գործ դատարան չի ուղարկվել։

Աղբյուր` Փաստինֆո