Փաստ ինֆո

ՀՀ վարչական դատարանում՝ դատավոր Մերի Համբարձումյանի նախագահությամբ, այսօր կայացել է ՀՀ ԶՈՒ ԳՇ պետի նախկին առաջին տեղակալ Տիրան Խաչատրյանն ընդդեմ ՀՀ նախագահ Արմեն Սարգսյանի գործով նախնական դատական նիստը։

Ինչպես արդեն տեղեկացրել ենք՝ Տիրան Խաչատրյանը հայցադիմում է ներկայացրել ընդդեմ Արմեն Սարգսյանի՝ վիճարկելով իրեն պաշտոնից ազատելու մասին որոշումը։ Խաչատրյանին պաշտոնից ազատելու պատճառը դարձել է Իսկանդերի վերաբերյալ Նիկոլ Փաշինյանի հայտարարությանը «ծիծաղով» արձագանքելը։ Մասնավորապես, Նիկոլ Փաշինյանը փետրվարի 23-ին լրատվականներից մեկին տված հարցազրույցում հայտարարել էր, թե պատերազմի ընթացքում կրակված «Իսկանդերը» չի պայթել կամ պայթել է 10 տոկոսով՝ ակնարկելով, որ գուցե Ռուսաստանը 80-ականների արտադրության զենք է տրամադրել Հայաստանին։

Փաշինյանի նշված հայտարարությունը բուռն արձագանք է ստացել թե՛ ՌԴ-ի կողմից, թե՛ փորձագիտական հանրության կողմից, քանի որ, ինչպես հայտնում են փորձագետները, դա առնվազն պրոֆեսիոնալ չէ։ Դրա հավանականության վերաբերյալ լրագրողի հարցին ի պատասխան ՀՀ ԶՈՒ ԳՇ պետի առաջին տեղակալը մեկնաբանել էր ծիծաղով՝ նշելով, որ դա հնարավոր չէ, որի հաջորդ օրը նա ազատվեց պաշտոնից։

Վարչական դատարանում այսօր կայացած դատական նիստի ընթացքում հայցվորի ներկայացուցիչը հայտարարեց, որ խախտվել է Տիրան Խաչատրյանի լսված լինելու իրավունքը, մասնավորապես, Սահմանադրությունն ամրագրում է, որ միջամտող վարչական ակտ ընդունելիս անձի լսված լինելու իրավունքը պետք է ապահովվի։ Զինվորական ծառայության եւ զինծառայողի կարգավիճակի մասին ՀՀ օրենքի համաձայն՝ բարձրագույն հրամանատարական կազմի զինվորական ծառայողներին պաշտոնից ազատումն իրականացվում է հետեւյալ կարգով՝ նախ պետք է լինի վարչապետի առաջարկությունը ուղղված ՀՀ նախագահին, պետք է լինի բարձրագույն հրամանատարական կազմի զինվորական ծառայողներին պաշտոնից ազատելու նախագիծը եւ պետական լիազոր մարմնի համապատասխան միջնորդությունը։ Փաստաբանի դիտարկմամբ՝ այս փաստաթղթերի մասին Խաչատրյանը տեղեկացված չի եղել, ինքը չի արտահայտել իր դիրքորոշումը, ուստի՝ խախտվել է նրա լսելի լինելու իրավունքը։ Բացի դա՝ ըստ հայցվորի՝ Խաչատրյանի նկատմամբ խտրական վերաբերմունք է ցուցաբերվել։

Երրորդ անձի՝ Նիկոլ Փաշինյանի ներկայացուցիչն էլ ներկայացրեց առարկությունները՝ նշելով, որ գոյություն չունի վարչական ակտ՝ արտաքին ներգործության հիմքով, այն անհատական իրավական ակտ է, որևէ օրենքի խախտում տեղի չի ունեցել, ուստի՝ դատարանից խնդրեց մերժել հայցն ամբողջությամբ։
Վարուժան Ավետիքյանի հարցին՝ արդյոք նախագահն իրավունք ունի ԶՈՒ ԳՇ պետի տեղակալին հրամաններ տալ և եթե այո, ապա արդյո՞ք տվյալ անձը պարտավոր է կատարել այն, պատասխանողի ներկայացուցիչը նշեց, որ հրամանների կատարման մասով նման ենթակայություն չունի։

«Մենք նշել ենք, որ առկա են և ենթակայության, և աշխատանքային հարաբերություններ։ Աշխատանքային հարաբերություններն այնքանով, որքանով նշանակելու իրավասություն ունեցող սուբյեկտը Հանրապետության նախագահն է, ենթակայական հարաբերությունների առումով՝ այն տեսանկյունից, որ ԶՈՒ ԳՇ-ն ԶՈՒ բաղկացուցիչ մասն է, որը Կառավարության ենթակայության ներքո է»,- նշեց նա՝ հավելելով, որ նախագահի կողմից հրամանագիր ստորագրելը ձևական բնույթի է, նախագահը զուտ ֆորմալացնում է վարչապետի առաջարկությունը՝ ստորագրելու ձևով։

Վարուժան Ավետիքյանի հարցին՝ նախագահն արդյո՞ք լիազորություն չունի և կամակատարն է վարչապետի, վարչապետի ներկայացուցիչն առաջարկեց՝ մնալ զուտ իրավական դաշտում՝ առանց սուբյեկտիվ մեկնաբանման, խորհրդարանական հանրապետություններում որոշումներ կայացնողը վարչապետն է։

Հեղինակ՝ Իզաբել Սահակյան

Աղբյուր` Փաստինֆո