Փաստ ինֆո

Էկոնոմիկայի նախարարի պաշտոնակատար Վահան Քերոբյանը կառավարութան մոտ հանդիպեց բողոքի ակցիա իրականացնող քաղաքացիներին, որոնք նախարարության օպտիմալացման ծրագրերով կրճատվել են։

«Բոլորը շատ են խոսում, որ պետական կառավարման մարմինները կարող են ավելի արդյունավետ աշխատել, կարող են ավելի քիչ մարդով ավելի լավ արդյունք տալ, ես բիզնեսից եմ եկել և համաձայն եմ այդ մտքի հետ։ 69 հաստիք է կրճատվել, բայց ավելի քիչ մարդ կա»։

Քերոբյանը նշեց, որ կրճատվել են միայն նորարարության և մոնիթորինգի վարչության աշխատակիցները։ Նրանց կրճատելու մասին որոշվել էր դեռ դեկտեմբերին։

«Իրենք օրենքի համաձայն կոմպենսացվելու են և ունենալու են բավականին երկար ժամանակ այլ աշխատանք ման գալու համար։ Որ շատ անկեղծ ասեմ՝ որոշվել է դեկտեմբերին և էլի պետական կառավարման անարդյունավետ աշխատանքի պատճառով այսքան երկար տևեց»։

Հարցին՝ ինչու հենց գյուղոլորտից են աշխատակիցներին կրճատում՝ Քերոբյանը նշեց. «Ինչ որ տեղից պետքա սկսվի՝ ճիշտա՞։ Հերթով ամեն ինչ անում ենք։ Լինելու են վերակառուցումներ, որի արդյունքում կլինեն մարդիկ, ում կարիքն այլևս չկա,կկրճատվեն և  գործառույթը կարելի է օնլայն անել...»։

Քերոբյանը խոսեց նաև իր աշխատավարձից, նշեց, որ այն էապես կրճատվել է, երբ տեղափոխվել է գործադիր։ Աշխատակիցները նշեցին, որ ժամանակավոր ծառայություն են մատուցում, ուստի իրենք մեկ ամսից էլ քիչ ժամանակ ունեն աշխատանք գտնելու համար, նախարարի պաշտոնակատարն էլ պատասխանեց՝ «Կարծեմ էդպես չէ։ Խոստանում եմ՝ ես կնայեմ, մաքսիմալ ինչքան հնարավոր է կոմպենսացիա ձեզ կառաջարկվի»։

Քերոբանը նշեց, որ օպտիմալացումով ու կրճատումների հաշվին դրական զարգացում կլինի։ Վերջինս տեղեկացրեց, որ 153 կետից բաղկացած ցուցակ են իրեն տվել, թե ինչ է արել վարչությունը նախորդ տարի։ Նշեց նաև, որ ակցիա անողները բարձրագույն կրթություն ունեն, մի աշխատանք իրենց համար կգտնվի։

Ակցիայի մասնակիցներից մեկն էլ նշեց, որ ինքն անասնաբույժ է, իրենց մարզում գործարան չկա՝ մի գյուղապետարան է, երկու մանկապարտեզ ու մի դպրոց, ինքը որտե՞ղ է աշխատանք գտնելու։

«Մեզ մոտ անասնաբույժների նենց մեծ պահանջարկ կա, եկեք ձեզ ուղարկենք, այնտեղ գործ կա։ Իմ կյանքում եղել է, օր, երբ որ ես 800 հոգի մարդ եմ կրճատել»,-ասաց Քերոբյանը։

Նախարարի պաշտոնակատարը հստակ չասաց, թե ինչպես է լուծվելու կրճատվող աշխատակիցների հետագա զբաղվածության հարցը։ Երիտասարդ կադրերն էլ բողոքում էին՝ չեն ուզում առանց աշխատանք մնալ։

«13 տարեկանից աշխատում եմ, մի օր չի եղել, որ ես անգործ մնամ։ Եթե մարդը ուզում ա գործ ճարի՝ հաստատ ճարողա։ Ես պատերազմից եկել եմ ու դարձել եմ նախարար ու էդ ժամանակ ինքս ինձ խոսք եմ տվել, որ աշխատելու եմ նենց անեմ, որ մեռած երեխեքի համար ստեղծեմ լավ ուժեղ երկիր, հիմա ես իմ աշխատանքով անելու եմ այնպես, որ իրանց հիշատակը վառ լինի ու դա լինելու է հզոր տնտեսություն ստեղծելով»։

Քաղաքացիներն էլ պահանջեցին հարգանքով խոսել զոհված զինծառայողների մասին։

«Հարցը լուծված է»,-հայտարարեց Քերոբյանը։

Աղբյուր` Փաստինֆո