Փաստ ինֆո

Էկոնոմիկայի նախարարության աշխատակիցները կառավարության մոտ բողոքի ակցիա են կազմակերպել. նախարարությունում աշխատատեղեր են կրճատվում։ Ակցիայի մասնակիցները տեղեկացրեցին, որ կրճատվել է նախարարության գյուղոլորտի 69 հաստիք, հավանաբար երկու ամսից կլուծարվի նաև խորհրդատվական բաժինը։

«Ամեն մարզային կառույցում թողնում են երեք մասնագետ, նման ծավալի աշխատանք երեք մասնագետով հնարավոր չէ կատարել։ Ունենք տպավորություն, որ նախարարության օպտիմալացման գործընթացը կատարվում է միայն գյուղատնտեսական վարչության աշխատողների հաշվին։ 69 հաստիք է կրճատվում, ունենք չճշտված տեղեկություն, որ կա 100-ից ավելի թափուր հաստիք»,- հայտնեց աշխատակիցներից մեկը։

Ակիցիային մասնակից քաղաքացիները պնդում են՝ գյուղացին հենց այս մասնագետների կարիքն ունի։ Վերջիններս բուժման և պրոֆիլակտիկ աշխատանքներում խորհրդատվություն են տրամադրում, օգնում, որ գյուղատնտեսությունը զարգանա, իսկ հիմա, երբ մասնագետներին կրճատում են, վստահ են, որ այս ոլորտը չի զարգանա և մեծ հարված կհասցվի՝ գյուղացին կմնա մենակ։ Գյուղատնտեսության ոլորտին վերաբերող պետական օժանդակության ծրագրեր կան, որոնք ամբողջ ծանրաբեռնված էին այս կառույցների վրա։

«Գյուղատնտեսությամբ զբաղվողները միլիարդներով սուբսիդավորված վարկեր են ստացել, գումարների ծախսման հետ կա ճիշտ մոնիթորինգի կամ ուղորդման անհրաժեշտություն։ Քիչ աշխատակից ունենալու դեպքում հնարավոր չի լինելու կառավարել։ Խելացի անասնագոմերի, ինտենսիվ այգիների հիմնման ծրագրերը ևս պարտադիր մոնիթորինգի կարիք ունեն ու անհասկանալի է, ինչպես է կառավարվելու այդ գործընթացը»,- ասաց ակցիայի մասնակիցը։

Աշխատակիցներից մեկը հայտնեց, որ նախարարը իրենց աշխատանքը անարդյունավետ է համարում, այնինչ ըստ աշխատակիցների՝ Վահան Քերոբանը պարզապես գործից անտեղյակ է։

«Նա նույնիսկ չգիտնի՝ ինչ աշխատանք ենք կատարում, ինչն է մեր պարտականությունը»,- նշեց աշխատակիցը։

Տարբեր մարզերի աշխատակիցները պահանջում են հանդիպել նախարարին պարզաբանելու՝ եթե վատ են աշխատել, թող աշխատակազմին փոխեն կամ եթե վատ են աշխատել, ինչո՞ւ են իրենց պարգևավճար տրամադրել։

Աղբյուր` Փաստինֆո