Փաստ ինֆո

Ոստիկանության ծառայողների և ԱԱԾ ՊՊԾ պետ Սարգիս Հովհաննիսյանի անհամաչափ գործողությունների, ինչպես նաև՝ ԱԺ «Իմ քայլը» խմբակցության պատգամավոր Սիսակ Գաբրիելյանի գործողությունների դեմ քրեական գործ կհարուցվի։ Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, քիչ առաջ բավարարեց՝ 2020թ դեկտեմբերին 28-ին ԱԺ շենքի մոտ խաղաղ ակցիայի ընթացքում ոստիկանների անհամաչափ գործողությունների փաստի առթիվ քրեական գործ հարուցելու պահանջով ՀՅԴ ԳՄ անդամ Արծվիկ Մինասյանի բողոքը։ 

Հիշեցնենք, որ 2020թ դեկտեմբերի 28-ին Արծվիկ Մինասյանը ոստիկանություն հաղորդում էր ներկայացրել այն մասին, որ նույն օրը խաղաղ ակցիայի ընթացքում ոստիկանության ծառայողներն առանց որևէ իրավական հիմքի բռնի կերպով բերման են ենթարկել ակցիայի մասնակիցներին: Նշված հաղորդումն ուղարկվել է ՔԿ, որտեղ քննիչ Լիլիթ Կարապետյանի կողմից նյութեր են նախապատրաստվել: Որոշում է կայացվել քրեական գործի հարուցումը մերժելու մասին: Որոշման դեմ դատախազություն ներկայացված բողոքի մերժումից հետո որոշումը բողոքարկվել է դատական կարգով:

Նյութերի նախապատրաստման ընթացքում Արծվիկ Մինասյանը բացատրություն է տվել՝ նշելով, որ հավաքը եղել է ինքնաբուխ, որի ընթացքում չի խախտվել որևէ իրավական նորմ: Բացի դա՝ ոստիկանները մինչև հավաքը ցրելը չեն զգուշացրել հավաքի մասնակիցներին՝ դրա անօրինական լինելու, հասարակական կարգը խախտելու մասին, չեն տրամադրել ողջամիտ ժամկետ՝ հավաքը դադարեցնելու համար:

Հավաքի ընթացքում Արծվիկ Մինասյանը գտնվել է մայթին, չի խախտել հասարակական կարգը, չի վիրավորել որևէ մեկին, անգամ չի հնչեցրել «Նիկոլ դավաճան »-ը, սակայն ոստիկանները առանց որևէ հիմքի բերման են ենթարկել Մինասյանին: Մասնավորապես, Մինասյանը նշել էր, որ ակցիան ցրելու գործընթացին մասնակցել են այլ անձինք ևս՝ կանաչ էլիտար համազգեստով ճաղատ անձ, իսկ ԱԺ պատգամավոր Սիսակ Գաբրիելյանի և նրա հետ գտնվող կանաչ զգեստով ինչ-որ անձի կողմից քաղաքացիների նկատմամբ բռնություն է գործադրվել:

Մինասյանը նյութերի նախապատրաստման ընթացքում նաև վարույթ իրականացնող մարմնին է ներկայացրել համապատասխան տեսանյութեր՝ ներկայացված հաղորդմամբ պահանջելով իրավական գնահատական տալ՝ վերջիններիս գործողություններին, ինչպես նաև՝ ոստիկանների գործողություններին և անգործությանը, մասնավորապես, պարզել կանաչ համազգեստով անձի ինքնությունը, վերջինիս կողմից հավաքի դադարեցման հիմքերը, բացատրություն վերցնել նրանից:

Հեղինակ՝ Իզաբել Սահակյան

Աղբյուր` Փաստինֆո