Փաստ ինֆո

Քաղաքական տրամաբանությունը հուշում է, որ եթե մարդը հրաժարական է տալիս, ապա պետք է պաշտոնակատար այլևս չմնա: Հետեւապես՝ Նիկոլ Փաշինյանը հրաժարական տալուց հետո պետք է չմնար պաշտոնակատար, նրա փոխարեն այլ մարդ պետք է լիներ: Սա կտեղավորվեր քաղաքական տրամաբանության մեջ:

Այս մասին «Փաստինֆո»-ի հետ զրույցում ասաց քաղաքագետ Երվանդ Բոզոյանը:

Դեռեւս 2018թ-ին Նիկոլ Փաշինյանը հայտարարել էր, որ Սերժ Սարգսյանը հրաժարականից հետո չի կարող մնալ ԺՊ, քաղաքագետն ասաց.

«Նիկոլ Փաշինյանը 2018թ-ին և Նիկոլ Փաշինյանը 2021թ-ին հակադիր Փաշինյաններ են: Նիկոլ Փաշինյանը 2018-ին մի շարք հարցերի շուրջ այլ տեսակետ ուներ, իսկ 2021թ-ին նույն հարցերի շուրջ տրամաբանորեն հակառակ կարծիքն ունի: Այստեղ զարմանալու բան չկա: Երբ նա եկավ իշխանության, կյանքը ստիպեց, որ փոխի իր տեսակետները, հիշում եք նաև ՀԱՊԿ-ի հետ կապված խնդիրները, Ռուսաստանի հետ հարաբերությունները: Այնքան խնդիրներ կան, որոնց շուրջ իր կարծիքը 180 աստիճան փոխել է, որ հիմա կարիք չկա մեկ կամ երկու խնդիր քննարկել: Բոլորի համար տեսանելի է, որ այդ մարդը կայուն քաղաքական տեսակետներ չունեցող մարդ է»,-ասաց փորձագետը՝ հավելելով՝ Հայաստանում տեղի են ունենում քաղաքական գործընթացներ, որտեղ ցանկացած մարդ օրենքը մեկնաբանում է իր ուզածով։

«Հայաստանում դե ֆակտո օրենք չի գործում, գործում է միայն քաղաքական զարգացման տրամաբանությունը »,-ասաց քաղաքագետը:

Անդրադառնալով Freedom House -ի տարեկան զեկույցին, ըստ որի, Հայաստանում 2018-ի հեղափոխությունից հետո առաջին անգամ ժողովրդավարության ցուցանիշն ընկել է՝ մեր զրուցակիցն արձանագրեց, որ Հայաստանում ապրող յուրաքանչյուր ոք հասկանում է, թե ինչ է կատարվում։

«Երկիրը վայրի ցնցումների մեջ է, որտեղ ամբողջ պետական համակարգը սպասարկում է մեկ մարդու շահերը: Միջազգային հանրությունը, մեղմ ասած, չի հետաքրքրվում Հայաստանի խնդիրներով, պարզապես միջազգային որոշ կառույցներ զգուշորեն գնահատական են տալիս, որոշ կառույցներ էլ ձեռնպահ են մնում գնահատական տալուց: Հայաստանում ապրող ցանկացած մարդու ակնհայտ է՝ թե ինչ է կատարվում Հայաստանում»,- ասել է նա:

Մեր խնդրանքով քաղաքագետը նաև անդրադարձավ Արցախի նախագահ Արայիկ Հարությունյանի հայտարարություններին, թե պատերազմի հետևանքները պարզ էին դեռ հոկտեմբերի սկզբին, սակայն իշխանության և ընդդիմության միջև միասնական կարծիք չի ձևավորվել պատերազմը կանգնեցնելու հարցում.

«Չի ձևավորվել քաղաքական միասնական կարծիք իշխանության և ընդդիմության միջև և, կարծես թե պատերազմը կանգնեցնելը այդ օրը համարում էին դավաճանություն»,-ասել է Արայիկ Հարությունյանը.

Քաղաքագետի դիտարկմամբ՝ ցանկացած մարդ պետք է բարոյական սահմաններ պահպանի, որպեսզի նման հայտարարություններ չանի:

«Այսինքն` պատերազմի ժամանակ իշխանությունը վախեցել է, դրա համար չի՞ կանգնեցրել պատերազմը, քանի՞ ավանակ կա, որ կհավատա այս ձևակերպումներին: Պատկերացնու՞մ եք երկիր, որը պատերազմի մեջ է, հայտարարի՝ թեև գիտեմ պատերազմը պարտվելու եմ, բայց չեմ դադարեցնում,քանի որ վախենում եմ ընդդիմության արձագանքից: Նույնիսկ Հայաստանի իշխանությունները նման բան չեն հայտարարել, չեմ հասկանում Արայիկ Հարությունյանի մղումը՝ լինել Հռոմի պապից ավելի կաթոլիկ»,-եզրափակեց Երվանդ Բոզոյանը:

Աղբյուր` Փաստինֆո