Փաստ ինֆո

Մենք հիմա քննարկում ենք փոփոխություններ, որոնք առնչվում են տարիներ ի վեր Սյունիքի մեր ընդերքը թալանածներին։ Այս մասին ասաց ԱԺ անկախ պատգամավոր Արման Բաբաջանյանը։

«Սյունիքում տեղի ունեցող իրադարձությունների բուն նպատակն այն է, որ ամեն գնով թույլ չտան՝ Հայաստանը ոտքի կանգնի, որպեսզի հանդարտ միջավայրում հասկանանք՝ արտաքին դերակատարների մասնակցությունն այդ տեղի ունեցող իրադարձություններին, որ ի վիճակի լինենք մատնացույց անել Հայաստանի իրական թշնամիներին և բարեկամներին։ Օրերս ՌԴ նախագահը հայտարարեց, որ բոլոր նրանք, ովքեր Ռուսաստանի հիմնարար շահերի դեմ որևէ սադրանք կանեն, կոշտ պատասխանի կարժանան։ Արդյոք այն, ինչ տեղի ունեցավ Արցախի, Հայաստանի հետ մեր ռազմավարական գործընկեր Ռուսաստանի հիմնարար շահերի հետ որևէ աղերս ուներ։ Կարծում եմ, որ տեղի ունեցածը շոշափում էր Ռուսաստանի հիմնարար շահերը, ուղղակի Ռուսաստանն ի վիճակի չեղավ, որ արժանիորեն պատասխանի Թուրքիայի ոտնձգություններին։ Ռուսաստանում միլիարդների հետևից գնացած իշխանավորները ավելի շատ նախընտրում են, որ ընկերություն անեն Էրդողանի և Ալիևի հետ, քան իրապես պաշտպանեն Ռուսաստանի հիմնարար շահերը»,-նշեց պատգամավորը։

Անդրադառնալով մի քանի պաշտոնյաների հայտարարությանը, որ մեր բանակի արդիականացումը հանձնել են Ռուսաստանին, պատգամավորը ցույց տվեց ռուսական արտադրության կալոշ և ասաց. «Հիմա այս կալոշը կուզեք արդիականացրեք, կուզեք բարեփոխեք, այն մնալու է բարեփոխված կամ արդիականացված կալոշ։ Իհարկե մեր զինված ուժերի արդիականացման առաջին մանդատը պիտի հանձնվի Ռուսաստանին, բայց վերջին օրերի զարգացումները, Հայոց ցեղասպանության ճանաչումը հաշվի առնելով թույլ տվեք, որ Հայաստանը մանևրելու, այլ ուղղություններով նայելու հնարավորություն ունենա։ Մի՛ խեղդեք Հայաստանի վաղվա օրը»,-նշեց Արման Բաբաջանյանը։

Աղբյուր` Փաստինֆո