Փաստ ինֆո

Երեւանի ընդհանուր իրավասության դատարանը քիչ առաջ որոշեց կալանավորել ՀՅԴ ԳՄ անդամ Արծվիկ Մինասյանի զարմիկին։

Երևանի ընդհանուր իրավասության դատարանը՝ դատավոր Գագիկ Պողոսյանի նախագահությամբ, բավարարեց ՀՅԴ ԳՄ անդամ Արծվիկ Մինասյանի զարմիկի՝ Հայկ Հեքիմյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը։ Այս մասին «Փաստինֆո»-ի հետ զրույցում հայտնեց փաստաբան Բենիկ Գալստյանը՝ նշելով, որ դատարանի որոշման դեմ վերաքննիչ բողոք կներկայացվի։

Պաշտպանական կողմը դատարանի որոշմանն ամբողջությամբ դեռևս չի ծանոթացել, սակայն, փաստաբանի փոխանցմամբ,  կալանավորելու  միջնորդությամբ քննիչը մատնանշել էր հիմքերից երեքը, որոնցից միայն խոչընդոտման  ռիսկն էր դատարանը հաստատված համարել։

Նշենք, որ  Հեքիմյանի և ոստիկանության ծառայողի միջև առերես հարցաքննություն արդեն եղել է, որի ընթացքում ոստիկանության ծառայողն ինքը հաստատել է, որ հարվածել է Հեքիմյանին, մասնավորապես նշել է, որ ինքը դիտավորյալ չի հարվածել, ձեռքերն անկանոն շարժել է, բայց հնարավոր է, որ կպած լինի և հնարավոր է, որ դրանից տպավորություն լինի, թե հարվածել է։

Հիշեցնենք, որ Հեքիմյանին մեղադրանք է առաջադրվել ՀՀ 316-րդ հոդվածի 1-ին մասով՝ իշխանության ներկայացուցչի նկատմամբ բռնություն գործադրելու հատկանիշներով։ Ըստ նախաքննական մարմնի՝ Հեքիմյանն ապրիլի 22-ին ՀՀ գլխավոր դատախազության շենքի մոտ տեղի ունեցած բողոքի ակցիայի ընթացքում սկսված հրմշտոցի ժամանակ ոստիկանության ծառայողին հարվածել է։

Նշենք, որ Հեքիմյանը ձերբակալվել էր ապրիլի 23-ին՝  ջահերով երթից առաջ, ըստ նախաքննական մարմնի՝ փախուստը կանխելու համար, մինչդեռ՝ փաստաբանի փոխանցմամբ ապրիլի 22-ին Հեքիմյանը շուրջ 2 ժամ շարունակել է գտնվել ՀՀ գլխավոր դատախազության շենքի տարածքում։ Դատարանը ոչ իրավաչափ էր ճանաչել Հեքիմյանի ձերբակալությունը և ազատ արձակել նրան, սակայն վարույթ իրականացնող մարմինը շտապել է մեղադրանք առաջադրել նրան և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը, փաստորեն բավարարվել է։ Ընդ որում՝ պաշտպանական կողմի դիտարկմամբ՝ այստեղ խոսքը չի կարող գնալ ՀՀ 316-րդ հոդվածի 1-ին մասով նախատեսված արարք կատարելու մասին, քանի որ այս դեպքում խոսքը չի գնում ոստիկանության ծառայողի՝ լիազորությունների կատարման հետ։

Հեղինակ՝ Իզաբել Սահակյան

Աղբյուր` Փաստինֆո