Փաստ ինֆո

Կոտայքում վարելահողերի միայն 37% է մշակվում: Այս մասին Կոտայքի մարզում տեղի ունեցած խորհրդակցության ժամանակ ասել է վարչապետ Նիկոլ Փաշինյանը:

Նշենք, ո Փաշինյանն այսօր այցելել է Կոտայք, որի մասին պաշտոնական հաղորդագրություն կառավարության էջում չկա։ Փոխարենը՝ Նիկոլ Փաշինյանի ֆեյսբուքյան էջում հրապարակվել է տեսանյութ՝ տեղեկացնելով, որ խորհրդակցության ժամանակ անդրադարձել է տարածքային համաչափ զարգացմանը, ժամանակակից գյուղատնտեսության ձեւավորմանը, այդ թվում՝ ինտենսիվ այգիների հիմնմանը, կաթիլային ոռոգման համակարգերի տեղադրման ուղղությամբ կառավարության նոր նախաձեռնությանը, սուբվենցիոն ծրագրերի խթանմանն ու մի շարք այլ հարցերի։

Ըստ Փաշինյանի՝ հողերի մեծամասնությունը շարունակում է մնալ չմշակված և սա հիմնարար խնդիր է Հայաստանի և Կոտայքի մարզի համար նույնպես: «Մեր հանրապետությունում միայն երկու մարզ կա, որտեղ մշակվում է վարելահողերի 50%-ին ավելին»,- ասել է Ն.Փաշինյանը՝ նշելով, որ խոսքը գնում է Արարատի և Արմավիրի մարզերի մասին: Մնացած մարզերում վարելահողերի 50 տոկոսն ու ավելին չեն մշակվում։

«Այս մասով մենք խնդիր ունենք կառավարության ընդունած ծրագրերի բովանդակության մասին իրազեկելու,որպեսզի մարդիկ տեսնեն, թե ինչ հնարավորություններ կան գյուղատնտեսության ոլորտում աջակցություն ստանալու: Ես կարծում եմ, որ մենք պետք է նոր ծրագրեր ներդնենք»,- ասել է նա եւ հիշեցրել կաթիլային ոռոգման ծրագրի մասին։

«Եթե որեւէ հողատարածքում տնտեսվարող անցնում է կաթիլային ոռոգման կամ անձրևացման՝ 5 տարի ոռոգման ջրի վարձավճարից կազատվի: Մենք առաջիկայում դե յուրե կընդունենք այս որոշումը»,- հայտարարել է Նիկոլ Փաշինյանը:
Մանրամասները՝ տեսանյութում

Աղբյուր` Փաստինֆո