Փաստ ինֆո

Արցախի նախագահ Արայիկ Հարությունյանը հայտարարել է, որ վերջին պատերազմի արդյունքները իր համար պարզ էին դեռ 2020-ի հոկտեմբերի սկզբին, սակայն Հայաստանում քաղաքական ուժերը չէին կարողացել համաձայնության գալ ռազմական գործողությունների վաղաժամ դադարեցման շուրջ: Այս մասին Հարությունյանն ասել է ԱՀ քաղաքաշինության նախարարության աշխատանքային կոլեկտիվի և շինարարական կազմակերպությունների ղեկավարների հետ հանդիպման ժամանակ:

Նա կարծում է, որ անցած աշնանը ռազմական գործողությունները բոլորովին այլ արդյունքի կհանգեցնեին, եթե միայն Ադրբեջանը կռվեր Լեռնային Ղարաբաղի դեմ, այլ ոչ թե թուրք-ադրբեջանական կոալիցիան` Մերձավոր Արևելքի վարձկանների հետ միասին:

«Մայիսի 12-ից հետո ռազմաքաղաքական կառավարությունը ճիշտ դասեր չի քաղել աշխարհի օրինակներից և ունենալով առավելություն բանակցային գործընթացում ավելի նպաստավոր արդյունքներ չի կարողացել ունենալ: Հակառակորդի կողմից պատերազմին մասնակցում էր Թուրքիան, և Անկարան առաջին իսկ օրը հայտարարել է, որ միասին Ադրբեջանի հետ իրենց հաջողել է հասնել «պատմական արդարությանը»: Միայն Սիրիայից պատերազմին մասնակցում էր մինչև 7 հազար մարդ»,-նշել է Հարությունյանը:

Մեկ այլ սխալ Հարությունյանն անվանեց այն փաստը, որ 1992-ի հունիսին Ղարաբաղի հայ բնակչությանը Շահումյանի, Մարտակերտի, Հադրութի, Մարտունու և Ասկերանի որոշ գյուղերի արտաքսումից հետո այն ժամանակվա իշխանությունները ոչինչ չձեռնարկեցին, որպեսզի այդ մարդիկ մնան Լեռնային Ղարաբաղում: Արդյունքում բոլորը (ավելի քան 50 հազար մարդ) հեռացան: Հարությունյանը կարծում է, որ Լեռնային Ղարաբաղի ներկայիս բնակչությունը պետք է լիներ ոչ թե 145 հազար, այլ ավելի քան 200 հազար, այդ դեպքում պատերազմը կհանգեցներ ուրիշ արդյունքների:

Նա Հայաստանի և Լեռնային Ղարաբաղի ապագան տեսնում է ավելի սերտ ռազմաքաղաքական դաշինքում: Արցախի ղեկավարը նշել է նաև Ռուսաստանի հետ համագործակցության առավել ամրապնդման անհրաժեշտություն, ուշադրություն հրավիրելով այն փաստի վրա, որ Թուրքիան չի պատրաստվում լքել տարածաշրջանը:

Աղբյուր` Փաստինֆո