Փաստ ինֆո

ՀՀ քաղաքացու նկատմամբ ոտնձգությունը, տվյալ պարագայում Արավուսի հովիվին քաշքշելը սպասելի երևույթներ են, որոնք պիտի լինեին։ Այս բեռն իշխանությունը պետք է կրի, որը չի անում։ «Փաստինֆո»-ի հետ զրույցի ժամանակ ասաց ԱԺ «Լուսավոր Հայաստան» խմբակցության պատգամավոր Աննա Կոստանյանը ։

Նա չի բացառել, որ հետագայում եւս նմանատիպ իրավիճակներ կստեղծվեն, եթե սահմանազատման աշխատանքների հետ կապված վերջնական հանգուցալուծող որոշումներ չկայացվեն.

«Եթե իշխանությունը պատասխաններ չտա, այս իրավիճակն անընդհատ ստեղծվելու է։ Հետագայում արդեն քաղաքացիական հասարակության շրջանում ենք ունենալու նման խնդիր, վաղը մյուս օրը կարող է իրավիճակ ստեղծվել, երբ հասարակ քաղաքացիներն իրենց տարածքում շրջելիս գերեվարվեն։ Ոչ մի երաշխիք չկա։ Գիտենք, որ դիրքեր էին առաջ տվել, հետո առանց մեկնաբանություններ տալու այդ դիրքերը հետ էին տվել։ Ոչ մի երաշխիք չկա, որ եթե այսօր 500 մ են գալիս, վաղը կարող է կիլոմետրերով առաջ գալ։ Ո՞վ է ի վերջո այս մարդկանց անվտանգությունը երաշխավորելու»,-ասաց Աննա Կոստանյանը։

Հարցին՝ արդյոք հետաքրքրվե՞լ է, թե ինչու են սահմանազատման աշխատանքներն ուշանում և ինչու մինչև հիմա մարդիկ իրենց սահմանները հստակ չգիտեն, Աննա Կոստանյանն ասաց, որ հարցումներ է ուղարկել, սակայն պատասխան դեռևս չկա. «Վարչապետի աշխատակազմ ևս ուղարկել եմ հարցում, որպեսզի հստակեցնեն՝ այդ հանձնաժողովում ովքեր են ներգրավված, արդյոք կոմպետենտ մարդիկ են, ինչ ֆորմատով են այդ սահմանազատման աշխատանքներն իրականացնում։ Սրանք հարցեր են, որոնք մեր քաղաքացիները պետք է իմանան։ Սահմանամերձ համայնքներում ապրող բնակիչները չգիտեն իրենց ապագան, չգիտեն ինչ հեռանկարով կարող են հետագայում էլ ապրել այդտեղ։ Բոլորի մոտ լարված և խուճապային տրամադրություններ են»,-նշեց պատգամավորը։

Վերջինս ընդգծեց՝ ՀՀ իրավապահ մարմինները հանցավոր անգործություն են դրսևորում՝ այդ դեպքերի առթիվ համապատասխան իրավական գործընթաց չձեռնարկելու համար, քանի որ քաղաքացիների կյանքի հետ գործ ունենք. «Եթե պատկան մարմինները որևիցե ռեալ, ադեկվատ ազդակ չեն տալիս, համապատասխան գործընթացներ չեն սկսում, ուրեմն սա հանցավոր անգործություն է»,-ասաց Աննա Կոստանյանը։

Մանրամասները՝ տեսանյութում

Աղբյուր` Փաստինֆո