Փաստ ինֆո

Մեր նպատակն է հնարավորինս մեծ թվով պատվաստված քաղաքացիներ ունենալ։ Լրագրողների հետ զրույցի ժամանակ այս մասին ասաց ՀՀ առողջապահության նախարար Անահիտ Ավանեսյանը։

«Վերջերս երկու հղիներ ծայրահեղ ծանր վիճակում տեղափոխվեցին հիվանդանոց։ Մեր կարծիքով, եթե նրանց այն բարեկամները, որոնք ռիսկային խմբում չեն, պատվաստված լինեին, այդ հղիները նման ծայրահեղ վիճակում չէին հայտնվի»,-ասաց նախարարը։

Դիտարկմանը, որ նախապես հայտարարվել էր AstraZeneca-ով պատվաստվելու համար սահմանված տարիքային շեմի մասին, իսկ այժմ փոփոխություն է եղել, նշանակում է ռիսկերը չեզոքացե՞լ են, Անահիտ Ավանեսյանն ասաց, որ AstraZeneca-ով պատվաստման և թրոմբոցիտների կապը դեռ վերջնական հաստատված չէ. «Վերջին շրջանում նկատում եք, որ աղմուկը և նման դեպքերի առկայությունը գրեթե զրոյական է։ Նման ցուցումներն ավելի հայեցողական և լրացուցիչ զգուշության միտում ունեին։ Մենք ռիսկի խմբի ներկայացուցիչների համար պահպանում ենք տարիքային շեմը, բայց նկատելով, որ AstraZeneca-ով պատվաստում են շատ երկրներում՝ անկախ տարիքից, մենք ևս հնարավորություն ստեղծեցինք, որ անձինք, որոնք կամավորության հիմունքով համաձայն են, նույնպես հնարավորություն ունենան»,-ասաց Անահիտ Ավանեսյանը։

Նախարարը նշեց, որ հաջորդ շաբաթ ունենալու ենք նաև չինական պատվաստանյութ, որը նույնպես հասանելի է լինելու 18-ից բարձր քաղաքացիների համար։

Աղբյուր` Փաստինֆո