Փաստ ինֆո

Գորիսի փոխքաղաքապետ Մենուա Հովսեփյանն այսօր հրավիրվել էր ՀՀ ՀՔԾ՝ հարցաքննության՝ իր նկատմամբ ոստիկանությունում կիրառված բռնության գործով։

«Փաստինֆո»-ի հետ զրույցում փոխքաղաքապետը պատմեց, որ այսօր առավոտյան քննիչի ու փաստաբանի հետ այցելել են նաեւ ոստիկանության Երևան քաղաքի վարչություն՝ դեպքի վայրի զննության, քանի որ ՔԿ-ից առանց որեւէ պատճառաբանության իրեն բերման էին ենթարկել Երևան քաղաքի վարչություն։

«Այսօր գնացել էի այնտեղ՝ ցույց տալու այն տարածքները, որտեղ ինձ տարել են։ Բնականաբար՝ իմ տված բացատրությունն ամբողջությամբ ապացուցվել է և այն սենյակը, որտեղ ինձ բերման են ենթարկել և, մեղմ ասած, իրենց ճիշտ չեն պահել, պատկանում է Երևան քաղաքի վարչության պետի՝ օպերատիվ գծով տեղակալ ոմն Արթուր Զաքարյանին։ Շատ էի ուզում, իհարկե, իմանալ, թե ում աշխատասենյակում եմ եղել ես, կարծում եմ, հետագայում հնարավորություն կունենամ առերեսվելու այդ անձի հետ։ Ես չեմ ուզում նրան ի ցույց դնել իմ հայրենասիրության չափը, բայց ուզում եմ ընդամենն իր աչքերի մեջ նայել և հասկանալ, թե ում պատվերն է կատարել։ Կարծում եմ՝ օրը կգա և դրա պատասխանը կտա»,- նշեց Հովսեփյանը՝ հավելելով, որ հավատում է քննիչին, քանի որ նա շատ արագ և անաչառ է աշխատում։

Հիշեցնենք, որ Մ.Հովսեփյանի նկատմամբ ոստիկանության բաժնում բռնություն է գործադրվել ընդդեմ Նիկոլ Փաշինյանի Սյունիքում տեղի ունեցած բողոքի ակցիաներից հետո . ոտքը դրել են գլխին, ասել՝ «հերո՞ս էիր խաղում, դե գնա», հետո՝ քարշ տվել այս պատից այն պատը։ Դեպքի մասին փաստաբանը հանցագործության մասին հաղորդում է ներկայացրել, ՀՔԾ-ն հարուցել է քրեական գործ եւ Գորիսի փոխքաղաքապետին ճանաչել որպես տուժող, նրա նկատմամբ նշանակել դատաբժշկական փորձաքննություն։

Հովսեփյանի խոսքով՝ եթե իրավական դաշտում գնահատական չտրվեց, տվյալ անձը միանշանակ պատասխանատվության է ենթարկվելու իր կատարած ապօրինի գործողությունների համար, իսկ այժմ կհետևի ընթացքին, քանի որ իրավապահ համակարգը գործը քննում է։

«Կարծում եմ՝ վերջիվերջո այս ապօրինություններին, պետական մակարդակով պատվերներին պետք է վերջ տրվի, մենք գործ ունենք հայրենիքի կորստի հետ։ Ես սյունեցի եմ և մինչև վերջ պայքարելու եմ արդարության համար։ Եթե այս միամիտները կարծում են, որ վախեցնելով, սպառնալիքներով, շոուներ սարքելով կարող են մեզ վախեցնել՝ չարաչար սխալվում են։ Նորից ու նորից պնդում եմ՝ Սյունիքը Հայաստանի դարպասն է և Սյունիքով է որոշվելու Հայաստանի հետագա ճակատագիրը։ Չի կարելի խաղալ Սյունիքի ճակատագրի հետ, ոչ ոքի էլ խորհուրդ չեմ տալիս՝ անհիմն կերպով միջամտել Սյունիքի գործընթացներին։ Սյունիքն ինքն է որոշելու իր ապագան»,- նշեց Հովսեփյանը։

Մանրամասները՝ տեսանյութում

Հեղինակ՝ Իզաբել Սահակյան

Աղբյուր` Փաստինֆո