Փաստ ինֆո

Երևանի ընդհանուր իրավասության դատարանում՝ դատավոր Արմինե Մելիքսեթյանի նախագահությամբ, քիչ առաջ հետաձգվեց «Ադեկվադ» միաբանության ղեկավար Արթուր Դանիելյանի և Ալեն Սիմոնյանի միջև ծեծկռտուքի գործով առաջին դատական նիստը։

Մեղադրող դատախազը նիստից առաջ գրություն էր ուղարկել դատարան՝ խնդրելով հետաձգել դատական նիստը և իր բացակայությունը համարել հարգելի։ Փաստաբան Տիգրան Աթանեսյանը դատախազի բացակայությունը որակեց որպես անհարգալից վերաբերմունք ինչպես դատարանի, այնպես էլ՝ դատավարության մյուս մասնակիցների նկատմամբ։ Դատական նիստին չէր ներկայացել նաև տուժող Ալեն Սիմոնյանը։

Հաջորդ դատական նիստը նշանակվել է հունիսի 29-ին՝ ժամը 15։00-ին։

Ավելի վաղ հայտնել ենք, որ Արթուր Դանիելյանին մեղադրանք է առաջադրվել ՀՀ քրեական օրենսգրքի 258-րդ հոդվածի 1-րդ մասով, այն բանի համար, որ նա «դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք դրսևորելով անձի նկատմամբ , կատարել է խուլիգանություն,որը զուգորդվել է անձի նկատմամբ բռնություն գործադրելով։ Նրա նկատմամբ որպես խափանման միջոց է ընտրված ստորագրությունը՝ չհեռանալու մասին»։

Նախաքննության վարկածով՝ 2020թ. ապրիլի 29-ին՝ ժամը 17:05-ի սահմաններում, ՀՀ Ազգային ժողովի փոխխոսնակ Ալեն Սիմոնյանը, Երևան քաղաքի «Մալիբուի այգի» կոչվող զբոսայգու տարածքում նկատելով «Ադեկվադ» կուսակցության նախագահ Արթուր Դանիելյանին, բարևել է նրան, սակայն վերջինս, ներկա անձանց մոտ սեփական անձի առավելությունն ընդգծելու նպատակով, սեռական բնույթի հայհոյանք է տվել ԱԺ փոխխոսնակի և նրա ծնողների հասցեին, որից անակնկալի եկած Ա.Սիմոնյանը ճակատով մեկ անգամ հարվածել է Ա. Դանիելյանի քթին, ինչից հետո նրանց միջև քաշքշուկ է սկսվել:

Այդ ժամանակ Ա. Դանիելյանը, անտեսելով հասարակական վայր հանդիսացող Երևանի մարդաշատ զբոսայգում գտնվելու հանգամանքը, տարածքում իրենց հանգիստն անցկացնող մարդկանց ներկայությամբ, խուլիգանական դրդումներով, շարունակել է դիտավորությամբ կոպիտ կերպով խախտել հասարակական կարգը՝ հասարակության նկատմամբ դրսևորելով անթաքույց արհամարհանք և բացահայտ անհարգալից վերաբերմունք, սեռական բնույթի հայհոյանքներ է տվել ՀՀ օրենսդիր իշխանության մարմնի ղեկավար աշխատողի հասցեին և բռնություն գործադրել նրա նկատմամբ՝ բռունցքով հարվածներ է հասցրել Ա.Սիմոնյանի գլխի շրջանին և մարմնի այլ մասերին՝ պատճառելով մարմնական վնասվածքներ:

Համացանցում տարածվել է նաեւ միջադեպի տեսագրությունը, որտեղ տեսանելի է, թե ինչպես է Ալեն Սիմոնյանը մոտենում ու առաջինը գլխով հարվածում Ա.Դանիելյանին։

Հեղինակ՝ Իզաբել Սահակյան

Աղբյուր` Փաստինֆո