Փաստ ինֆո

Պատկան մարմինները պետք է ձեռնարկեն բոլոր միջոցառումները նմանօրինակ դեպքերը բացառելու համար: Այս մասին լրագրողների հետ զրույցում ասաց «Իմ քայլը» խմբակցության պատգամավոր Արմեն Խաչատրյանը՝ անդրադառնալով օրեր առաջ Սյունիքի մարզի Արավուս գյուղում տեղի ունեցած միջադեպին, երբ ադրբեջանցիները արավուսցի հովիվին քաշքշել էին և հարվածել էին աչքին:

«Այնպես չէ, որ Սյունիքում բնակվելը վտանգավոր է: Բնական է, որ կարող են նմանօրինակ միջադեպեր լինել, այնպես չէ, որ մեր հարևանը Շվեյցարիան է, Ֆրանսիան է, և այն ամենը, ինչ գրված է թղթի վրա, պայմանավորվածությունները կան համաձայնագրով, լիակատար, օրենքի տառին համապատասխան իրականացվելու են: Լինելու են միջադեպեր, սակայն դրանք պետք է հնարավորինս կանխվեն: Եթե ադրբեջանի զինծառայողները բռնություն են գործադրում մեր հովվի վրա, հարցը պետք է մանրամասն քննվի և ներկայացվի նաև ռուս խաղաղապահ ուժերին»,-ասաց Արմեն Խաչատրյանը:

Պատգամավորը հայտնեց նաև, որ սահմանի ամբողջ երկայնքով տեխնիկական միջոցներ, փշալարեր, տեսահսկման սարքեր են տեղադրվում:

Անդրադառնալով՝ Փաշինյանի՝ Սյունիք այցի ընթացքում տեղի ունեցած միջադեպերին, պատգամավորև կարծում է՝ Սյունիքում տեղի ունեցածը ժողովրդի ձայնը չէր և ժողովրդի կազմակերպածը չէր:

Հարցին՝ արդյո՞ք «Իմ քայլը» Սյունիքում մեծաթիվ ձայներ ստանալու հնարավորություն ունի, պատգամավորն արձագանքեց.
«Ես վստահ եմ, որ Սյունիքի մարզում մենք ունենալու ենք ձայների մեծամասնություն»։

Աղբյուր` Փաստինֆո