Փաստ ինֆո

«Մանախ» մականունով հայտնի Արթուր Եպիսկոպոսյանը ֆեյսբուքյան էջի ուղիղ եթերում «ունիկալ» է որակել Սյունիքի մարզպետի հայտարարությունը։ Մանախը կարծում է, որ հիմա փորձ է արվում դիվանագիտորեն ներկայացնել, թե բաժանված զենքերով մարդիկ կրակել են, այդ պատճառով էլ հավաքում են գյուղացուն տրված զենքերը։ 

«Արավուս գյուղում, երբ որ բոլորը խոստացան, որ գյուղի զենքերը չի հավաքվելու և գյուղացիները զենքով պաշտպանելու են գյուղը, հերթական անգամ մեզ խաբեցին։ Երեկ եկել են գյուղի հինգ միավոր զենքերը հավաքել են, պոստերը փակել են ԶՈՒ-երի երեխեքով։ Տեղի է ունենում դավաճանություն։ Դուք ինչո՞ւ եք հավաքել գյուղացու զենքը, երբ որ պոստերը պահում են ընդամենը 6-7 երեխա։ Աստված մի արասցե՝ հակառակորդի ներթափանցման դեպքում, եթե գյուղացիները անցնեն ինքնապաշտպանության, որևէ մեկը գյուղերում զենք չունի»։

Մանախն առաջարկում է ամեն արձակած կրակոցով անցկացնել քննություն՝ պարզելու համար դրանց նպատակը։

«Եթե ուզում եք կրակոցները կապել վերջին դեպքերի հետ, հիշեցնեմ, որ 130 մարտական դիրքը Կապանի ուղղութամբ, որ հանձնել եք շատ հանգիստ, որ այդ օրը մարտ է ընթացել, որ այդ օրը վեց հոգով մարտ են վարել 50 հոգի թշնամու դեմ, կրակել մինչև վերջին «բեկան», զինաթափել եք ու դիրքը հանձնել։ Այդ կրակոցի օրը ինքնուրուն կանխարգելիչ կրակ ենք բացել ձայների ուղղությամբ՝ կանխելով հնարավոր ներթափանցումը գյուղի տարածք»։

Մանախն ասում է, որ սահմանները պաշտպանողները չունեն գիշերային տեսանելիություն ապահովող սարքեր։ Ըստ նրա, կրակոցները երբեք աննպատակ չեն լինում, երբեմն պարզապես ճնշող կրակոցներ են լինում, երբ կասկածներ են ունենում, որ թշնամին ներթափանցման փորձ է անում։

Նա դիմում է ՀՀ գլխավոր դատախազին և ԱԱԾ քննչական դեպարտամենտի ղեկավարին՝ իրենց լիազորությունների շրջանակում, անհապաղ ձեռնարկել բոլոր միջոցառումները, պահանջել նյութերն ու քննություն անցկացնել։

«Տեղեկություն է ստացվել, որ Սյունիքի մարզի քննչական մարմինները իմ լայվի հիման վրա այցեր են կատարել դիրքեր, 18 տարեկան ժամկետային զինվորներից գրություն վերցրել։ Եթե դուք մտածում եք, որ մենք ձեր դասարանի Սյոմիկն ենք, այսքան հետախույզներով գտնվելով տարածքում մենք չունենք հավելյալ փաստեր՝ դուք չարաչար սխալվում եք։ Պահանջում եմ տվյալ նյութերի և տվյալ քրեական գործի նախաքննության նկատմամբ իրականացնել ԱԱԾ կողմից օպերատիվ վերահսկողություն։ Եվ դուք կտեսնեք, թե զինվորներին ով է ասել, որ նման բացատրություն տան»,- ասել է Մանախը։

Աղբյուր` Փաստինֆո