Փաստ ինֆո

Ադրբեջանցիների կողմից Շուռնուխի բնակչի 13 կովերն ադրբեջանական տարածք քշելու, այն է հափշտակելու դեպքի առթիվ ՀՀ ոստիկանությունը հրաժարվել է քրեական գործ հարուցել։ Նկատենք՝ ոչ թե մերժել են քրեական գործի հարուցումը, այլ պարզապես թողել են առանց հետեւանք։

Ադրբեջանցիների կողմից հայ գյուղացու կովերի հափշտակության մասին հայտնի դարձավ մոտ մեկ ամիս առաջ։ «Շուռնուխցի Գավրուշ Հակոբյանի անասնագոմը գտնվում է Շուռնուխից Կապան ճանապարհի 500 մետրի վրա։ Հայտնի GPS-յան գծագրումով գոմերից մի քանի մետր այն կողմ արդեն դիրքավորված թուրքն է։ Ուրբաթ օրը ադրբեջանցիները գողացել են Գավրուշի 13 մայր կովերն ու քշել դեպի ադրբեջանական Սեյթազ գյուղ։ Անասունների հետքերով ֆերմերի որդին, ռուս խաղաղապահների հետ գնացել է այդ գյուղը, որտեղ ասել են՝ հա, կտանք ձեր անասուններին ու էդպես էլ մինչ օրս չեն վերադարձրել»,- մարտի 30-ին տեղեկացրել էր ՀՀ ԱԺ պատգամավոր Նաիրա Զոհրաբյանը։

Դեռեւս ապրիլի 2-ին ՀՀ ոստիկանության լրատվական ծառայությունից «Փաստինֆո»-ին հայտնել էին, որ դեպքի առթիվ ՀՀ ոստիկանության Գորիսի բաժանմունքում նյութեր են նախապատրաստվում։ «Փաստինֆո»-ն այսօր՝ ապրիլի 27-ին, դիմեց ՀՀ ոստիկանություն պարզելու, թե նյութերի նախապատրաստման արդյունքում ինչ որոշում է կայացվել՝ նկատի ունենալով, որ դրա համար նախատեսված 10-օրյա ժամկետը լրացել։ Բայց պարզվեց, որ ոստիկանությունը ոչինչ էլ չի արել, նյութերի նախապատրաստումը պարզապես «հետողորմյա» են արել ։

«Հրապարակումը նյութեր նախապատրաստելու ցուցումով բաժին չի ուղարկվել»,- հայտնեցին ոստիկանությունից՝ ասելով, թե «Հրապարակումը պետք է ուսումնասիրվեր, ուղարկվեր, բայց այդպես էլ չի ուղարկվել, իսկ քաղաքացու կողմից ոստիկանական բաժին հաղորդում, կամ դիմում չի ներկայացվել»։

Նկատենք, որ կատարված հանցագործության մասին օրեր շարունակ մամուլը գրում էր, ավելին Շուռնուխի գյուղապետ Հակոբ Արշակյանը դեռեւս ապրիլի 2-ին «Փաստինֆո»-ին հայտնել էր, որ իրենց թաղային ոստիկանները տվյալներ են վերցրել և զբաղվում են գործով։

Փաստացի ոստիկանությունը տվյալները վերցնելով որոշել է տեր չկանգնել թշնամու կողմից իր քաղաքացու իրավունքների ոտնահարմանը, իր քաղաքացու նկատմամբ առերեւույթ կատարված հանցագործությանը։ Ի դեպ՝ այս ընթացքում ադրբեջանական կողմն այդպես էլ չի վերադարձրել Շուռնուխի գյուղացու անասունները, որոնք վերջինիս ապրուստի միջոցն են։ Ավելին՝ ոտնձգության նոր դեպքեր են արձանագրվում, ադրբեջանցիները շարունակում են կրակոցներ արձակել Սյունիքի տարբեր գյուղերի ուղղությամբ, քաշքշել ու հարվածել հայ հովիվին, քարերով հարվածել հայկական ավտոմեքենաներին։ Ի դեպ, հայ հովիվի նկատմամբ դաժան վերաբերմունքին եւս քննչական մարմինները ընթացք չեն տվել։

Այսպիսով՝ ադրբեջանցիների հայատյաց վերաբերմունքն անգամ Հայաստանի տարածքում անպատիժ է մնում, ինչի հետևանքով չի բացառվում, որ այդ արարքները շարունակական լինեն։

Աղբյուր` Փաստինֆո