Փաստ ինֆո

Ադրբեջանն իրեն պահում է ծայրահեղ ապակառուցողական։ Խախտում է և՛ եռակողմ հայտարարությունը, և՛ միջազգային հումանիտար իրավունքը՝ չվերադարձելով մեր ռազմագերիներին։ Մամուլի ասուլիսի ժամանակ այս մասին ասաց ԱԺ «Իմ քայլը» խմբակցության պատգամավոր Ռուբեն Ռուբինյանը։

Նրա խոսքով ռազմագերիներին վերադարձնելու միակ ճանապարհը միջազգային ճնշման մեծացումն է. «Դա համապարփակ գործընթաց է, որը պետք է տեղի ունենա հնարավոր բոլոր միջազգային ատյաններում, հնարավոր բոլոր երկկողմ հարաբերություններում և վստահ եմ, որ մեզ ի վերջո կհաջողվի հասնել մեր նպատակին»,-ասաց պատգամավորը։

ԱԺ պետաիրավական հանձնաժողովի նախագահ Վլադիմիր Վարդանյանն էլ նկատեց՝ Մարդու իրավունքների եվրոպական դատարանը շատ քիչ դեպքերում է դիմում նախարարների կոմիտեին՝ տեղեկացնելու, որ այս կամ այն պետությունը չի ցանկանում համագործակցել եվրոպական դատարանի հետ. «Ադրբեջանի չհամագործակցելու աստիճանը հասել է մի մակարդակի, որ դատարանի համար կարիք է առաջացել դիմել նախարարների կոմիտեին։ Ադրբեջանում բացված պուրակը վկայում է այն մասին, որ հանձինս Ադրբեջանի ունենք ռասսայական խտրականության վրա հիմնված մի պետություն, որը որևիցե եղանակով չի կարող երաշխավորել ոչ միայն հայ ռազմագերիների, այլ ընդհանրապես էթնիկ հայերի անվտանգ գոյությունն Ադրբեջանի վերահսկողության տակ գտնվող որևիցե տարածքում»,-նշեց պատգամավորը։

Աղբյուր` Փաստինֆո